काठमाडौँ । नेपालको जनगणना २०७२ अनुसार मनाङको नार्पाभूमि सबैभन्दा कम जनसङ्ख्या हुने गाउँपालिका भएको छ । नार्पाभूमिको जनसङ्ख्या ४४२ मात्र रहेको छ । मनाङ जिल्लाकै अन्य गाउँपालिका पनि कम जनसङ्ख्या भएका गाउँपालिकामा परेका छन् । सो जिल्लाका ङिस्याङ र नासों कम जनसङ्ख्या भएका गाउँपालिका हुन् । हिमालपारिको अर्को जिल्ला मुस्ताङको लो–घेकर दामोदर कुण्ड गाउँपालिका पनि कम जनसङ्ख्या भएको गाउँपालिका भएको केन्द्रीय तथ्याङ्क विभागले जनाएको छ ।
विभागले सबैभन्दा धेरै जनसङ्ख्या बाँकेको बैजनाथपुर रहेको उल्लेख गरेको छ । बैजनाथपुर गाउँपालिकाको जनसङ्ख्या ७० हजार ३१५ रहेको छ । बाँकेकै राप्ती सोनारी र खजुरा तथा रुपन्देहीको मायादेवी र कपिलवस्तुको मायादेवी गाउँपालिका सबैभन्दा धेरै जनसङ्ख्या रहेका गाउँपालिका हुन् । विभागका अनुसार १० हजारभन्दा कम जनसङ्ख्या रहेका गाउँपालिकाको सङ्ख्या १० र ५० हजारभन्दा बढी जनसङ्ख्या रहेका गाउँपालिका १५ रहेका छन् ।
बुधबार विभागले नेपालको जनगणना २०७२ को प्रारम्भिक नतिजा सार्वजनिक गरेको हो । विभागले नेपालको जनगणना २०७२ अनुसार नेपालको जनसङ्ख्या दुई करोड ९१ लाख ९२ हजार ४८० पुगेको छ जनाएको छ ।
