काठमाडौँ । फुटपाथ विस्तार भन्दै काठमाडौं महानगरपालिकाले सडकका किनारा भत्काएको स्थानमा कालोपत्रे गरिएको छ ।
महानगरपालिकाका मेयर बालेन साहको योजनाअनुसार भत्काइएको सडकलाई कालोपत्रे गरेर पुरानै अवस्थामा फर्काइएको हो ।
सडक डिभिजन कार्यालयको टोलीले सोमबार उक्त सडकको काटिएको भाग कालोपत्रे गरेको छ ।
उक्त सडक विस्तार गर्न लाग्दा काठमाडौं महानगरपालिका र सडक विभागबीच जुहारी चलेको थियो । मेयर साह र वडाअध्यक्षबीच पनि उक्त सडक काटिएकोमा बैठकमै भनाभन भएको थियो ।
सडक विभागले मापदण्डविपरीत काटिएको उक्त सडक तीन दिनभित्र पुर्न काठमाडौं महानगरपालिकालाई भनेको थियो । तर मेयर साहले आफ्नो अडान नछाडेपछि सडक विभागले सोमबार उक्त सडकमा कालोपत्रे गरेको हो ।
नगरप्रहरी र सडक विभागका कर्मचारीबीच केहीबेर विवाद उत्पन्न भएको थियो । केही स्थानीयले नगरप्रहरीविरुद्ध नाराबाजी समेत गरे । घटनास्थलमा नेपाल प्रहरी प्रवेश गरेपछि नगरप्रहरी फर्किएका छन् ।
