एजेन्सी । बलिउड अभिनेत्री रविना टण्डन र उनका चालकमाथि मदिराको नशामा एक वृद्ध महिलालाई कुटपिट गरेको आरोप लागेको छ । घटना शनिबार राति भएको पीडितका छोराले दाबी गरेका छन् ।
मुम्बईको बान्द्रास्थित रिजवी ल कलेज नजिकै रविनाको कारले उनकी आमालाई ठक्कर दिएको थियो ।
‘यसपछि रविनाका चालक कारबाट बाहिर आए र मेरी आमा र परिवारका अन्य सदस्यहरूसँग झगडा गर्न थाले । उसले झडप सुरु गर्यो । यसपछि रविना पनि कारबाट ओर्लेर उनीहरुसँग झगडा गर्न थालिन् ।’ उनले भने ।
सार्वजनिक भएको एक भिडियोमा रविनालाई पीडित परिवार र स्थानीय भीडले घेरेको देखिन्छ । मानिसहरूले प्रहरीलाई बोलाउने कुरा गरिरहेका छन् । यसैबीच पीडित महिलाकी छोरीले रविनालाई भनिन्, ‘तिमीले रातभर जेलमा बिताउनुपर्छ । मेरो नाकबाट रगत बगिरहेको छ ।’
पीडितले प्रहरी चौकीमा उजुरी दर्ता गराउन खोजे पनि प्रहरीले कारबाहीमा कडाइ नगरेको उनको भनाइ छ । घाइते महिलाको उमेर ७० वर्ष रहेको बताइएको छ ।
