जनकपुरधाम । कान्तिपुर मिडिया ग्रुपका अध्यक्ष कैलाश सिरोहियालाई साधारण तारेखमा छाड्न माग गर्दै जनकपुरधामका मेयर मनोज कुमार साह धर्ना बसेका छन् ।
जिल्ला अदालत धनुषा अगाडि केहि नगरवासीसहित मेयर साह पनि धर्ना बसेका हुन् ।
नागरिकता नम्बर फरक हुनुमा अध्यक्ष सिरोहियाको दोष नरहेको बताउदै उनले भने ‘नागरिकता नम्बरमा फरक छ भने त्यो त जिल्ला प्रशासन कार्यालयको त्रुटि हो । यसमा सिरोहिया जीको के दोष ? उहाँ त जनकपुरवासी हुनुहुन्छ । नेपाली नागरिक हुनुहुन्छ ।’
राज्यले जनकपुरधाम र मधेशसँग विभेद गरिरहेको आरोप लागाउदै उनले विभेदपूर्ण सिरोहियामाथि चलाएको मुद्दा खारेज गर्न माग गरे ।
नागरिकता कीर्ते सम्बन्धी कसुरमा पक्राउ परेका सिरोहियालाई अदालतले तीन दिन हिरासतमा राखेर अनुसन्धान गर्न प्रहरीलाई अनुमति दिएको थियो । उक्त म्याद सकिएकोले प्रहरीले आज पुन: म्याद थप्न उनलाई अदालत ल्याएको छ ।
