काठमाडौं । सर्वोच्च अदालतको संवैधानिक इजलासमा जारी सुनुवाइमा नेपाल बार एशोसिएसनको एमिकस क्युरीका एक सदस्यले इजलासमा न्यायाधीश थप गर्नुपर्ने राय दिएका छन् । एमिकस क्युरीका सदस्य वरिष्ठ अधिवक्ता बद्रीबहादुर कार्कीले संवैधानिक इजलासमै न्यायाधीश थप गर्नुपर्ने बताएका हुन् ।
संविधानले प्रधानन्यायाधीश र चार न्यायाधीश रहने भनेको न्यूनतम भएको भन्दै उनले भने, ‘मुद्दाको अवस्था र गम्भीरता हेरेर थप गर्न सकिन्छ ।’
प्रधानन्यायाधीश चालेन्द्रशम्शेर जबराले भने संविधानभन्दा बाहिर जान कहाँ मिल्छ र भनेर प्रश्न गरेका थिए ।
वरिष्ठ अधिवक्ता कार्कीले भने न्यायाधीश थप गर्दा संविधान उल्लंघन भएको नमानिने बताए ।
संसद विघटनविरुद्ध परेका १३ वटा रिट प्रधानन्यायाधीश जबरा, न्यायायीशहरु सपना मल्ल प्रधान, विश्वम्भरप्रसाद श्रेष्ठ, अनिलकुमार सिन्हा र तेजबहादुर केसीको संवैधानिक इजलासमा विचाराधीन छ । शुक्रबार बहस गरेका वरिष्ठ अधिवक्ता विष्णु भट्टराई लगायत प्रधानमन्त्रीका निजी वकिलहरुले यो मुद्दा संवैधानिक इजलासले नै हेर्नुपर्ने बताए ।
