काठमाडौं । नेकपा एमालेका अध्यक्ष केपी शर्मा ओलीले पार्टी तथा राज्यका विभिन्न क्षेत्रमा पुस्तान्तरण निश्चित विधि, प्रक्रिया र योग्यताका आधारमा क्रमशः हुँदै जाने बताउनुभएको छ । उहाँले नयाँ पुस्तालाई तालिम, क्षमता विकास र जिम्मेवारी प्रदान गर्दै नेतृत्वका लागि तयार गर्नुपर्नेमा जोड दिनुभएको छ ।
पार्टीको मिसन पार्टी जागरण अभियान तथा अगुवा कार्यकर्ता भेलालाई सम्बोधन गर्दै अध्यक्ष ओलीले पुस्तान्तरणको नाममा समाजमा विभाजन सिर्जना गर्ने प्रयास भइरहेको आरोप लगाउनुभयो । जात, धर्म र भूगोलका आधारमा समाजलाई विभाजन गर्न नसकेपछि अहिले बाबु–छोरा तथा हजुरबा–नातिबीच पुस्तागत द्वन्द्व सिर्जना गर्न खोजिएको उहाँको भनाइ थियो ।
उहाँले पुस्तान्तरण स्वाभाविक प्रक्रिया भए पनि त्यसका लागि निश्चित प्रणाली र तयारी आवश्यक पर्ने बताउनुभयो । नयाँ पुस्तालाई योग्य, दक्ष र सक्षम बनाएर क्रमशः जिम्मेवारी दिँदै लैजानुपर्ने उल्लेख गर्दै उहाँले अनुभव र क्षमता हासिल नगरी तत्काल नेतृत्वमा पुग्न खोज्नु उचित नहुने धारणा राख्नुभयो ।
‘एकैचोटि प्रोफेसर भइन्न । त्यसको प्रक्रिया हुन्छ, त्यसको सिलसिला हुन्छ । त्यसैले हाम्रो नयाँ पुस्तालाई योग्य, दक्ष बनाउनुपर्छ, कामको जिम्मा दिनुपर्छ र जिम्मेवारी दिँदै तालिममार्फत सक्षम बनाएर अगाडि बढाउनुपर्छ,’ उहाँले भन्नुभयो ।
आफ्नो राजनीतिक जीवनको सुरुवाती समय स्मरण गर्दै अध्यक्ष ओलीले तत्कालीन राजनीतिक परिस्थितिमा आफू र अन्य नेताहरू कम उमेरमै नेतृत्व तहमा पुगेको बताउनुभयो । तर त्यतिबेलाको अवस्थालाई अहिलेको समयसँग तुलना गर्न नमिल्ने उहाँको जिकिर थियो ।
२० वर्षको उमेरमा सीपी मैनाली र आफू १९ वर्षको उमेरमा नेतृत्व तहमा पुगेको प्रसङ्ग उल्लेख गर्दै उहाँले अहिले पनि १९ वर्षको व्यक्तिले पार्टी प्रमुख बन्नुपर्छ भन्ने तर्क हास्यास्पद हुने बताउनुभयो । अहिले राजनीतिक आन्दोलनको अवस्था विगतको जस्तो नरहेको भन्दै उहाँले नयाँ पुस्ताले नेतृत्वका लागि आवश्यक प्रशिक्षण र अनुभव हासिल गर्नुपर्ने धारणा राख्नुभयो ।
अध्यक्ष ओलीले समाजमा सबै उमेर समूहका मानिसको भूमिका हुने भन्दै कुनै एक पुस्तालाई मात्र प्राथमिकता दिएर अघि बढ्न नसकिने बताउनुभयो । व्यक्तिले जिम्मेवारी निर्वाह गर्न नसक्ने अवस्था आएपछि नेतृत्वबाट हट्नुपर्ने उल्लेख गर्दै उहाँले क्षमताअनुसार जिम्मेवारी हस्तान्तरण स्वाभाविक रूपमा हुने बताउनुभयो ।
उहाँले पार्टीभित्र पुस्तान्तरणलगायत विषयमा अनावश्यक विवादमा नअल्झिन कार्यकर्तालाई आग्रह गर्नुभयो । अहिले एमालेमा एकता आवश्यक रहेको भन्दै उहाँले सम्पूर्ण कार्यकर्ता पङ्क्तिलाई एकजुट भएर अघि बढ्न आह्वान गर्नुभयो ।
एउटा निर्वाचनमा पराजित हुँदैमा एमाले कमजोर नहुने दाबी गर्दै अध्यक्ष ओलीले कार्यकर्तालाई उच्च मनोबलका साथ पार्टी जागरण अभियानमा सक्रिय हुन आग्रह गर्नुभयो । एमालेले नै देशलाई सही बाटो देखाउने उहाँको भनाइ थियो ।
