एजेन्सी । चर्चित कन्नड तथा तेलुगु टिभी अभिनेत्री पवित्रा जयरामको सडक दुर्घटनामा मृत्यु भएको छ ।
पवित्रा बेंगलुरुबाट हैदरावाद जाँदै गर्दा उनको कार नियन्त्रण बाहिर गएर पहिले डिभाइडरमा ठोक्कियो र त्यसपछि बसले उनको कारलाई ठक्कर दियो । दुर्घटनामा पवित्राको घटनास्थलमै मृत्यु भएको थियो ।
उनका काका र चालक गम्भिर घाइते भएका छन् । प्रहरीका अनुसार आइतबार राति १ बजे महबुबनगर जिल्ला नजिक यो दुर्घटना भएको हो ।
दुर्घटनाका कारण साउथ फिल्म उद्योग स्तब्ध भएको छ । अभिनेता समिप आचार्यले पवित्राको निधनप्रति दुःख व्यक्त गरेका छन् ।
पवित्राले कन्नड टिभी उद्योगको सिरियल ‘जोकाली’बाट आफ्नो करियर सुरु गरेकी थिइन् । २०१८ मा, उनले तेलुगु टिभी उद्योगमा ‘निन्ने पेल्लादथा’शो बाट डेब्यु गरेकी थिइन् । उनले टिभी सिरियल तिलोत्तमाबाट घरेलु पहिचान पाएकी थिइन् । पवित्रा धेरै कन्नड टेलिभिजन शृंखलाका लागि परिचित थिइन् । यस बाहेक उनले धेरै भाषाका टिभी शो र फिल्महरूमा पनि काम गरिन् ।
