काठमाडौं ।रसुवामा आएको आकस्मिक बाढीपछि सरकारले उद्धार, राहत तथा समन्वयका लागि सुरक्षा निकायसहित राज्यका विभिन्न संयन्त्र परिचालन गरेको छ।
उद्धार कार्यलाई तीव्रता दिन नेपाली सेनाका दुई वटा उद्धार हेलिकप्टर र स्वास्थ्यकर्मीसहितको एमआई–१७ हेलिकप्टर गरी तीन वटा हेलिकप्टर टोली नुवाकोट र रसुवातर्फ प्रस्थान गरेका छन्।
यस्तै, धादिङ, नुवाकोट, रसुवा र चितवनमा रहेका सबै सुरक्षा निकायलाई फिल्डमा परिचालन गरिएको छ। प्रभावित क्षेत्रमा उद्धार तथा राहत कार्यलाई प्रभावकारी बनाउन सुरक्षा निकायले आवश्यक समन्वय गरिरहेका छन्।
यसैबीच, नेपाल टेलिकमले धादिङ, नुवाकोट, रसुवा र चितवनमा फोन तथा डाटा सेवा निःशुल्क उपलब्ध गराएको छ। विपद्को समयमा उद्धार, राहत तथा आपसी समन्वय सहज बनाउन यस्तो व्यवस्था गरिएको हो।
सरकारले प्रभावित क्षेत्रमा उद्धार तथा राहत कार्यलाई प्राथमिकतामा राख्दै आवश्यक थप संयन्त्र परिचालन गर्ने जनाएको छ।
