काठमाडौं । नेपालस्थित पाकिस्तानी दूतावासले १८० जना नेपाली विद्यार्थीहरूलाई छात्रवृत्ति प्रदान गरेको छ । काठमाडौंमा आयोजित विशेष समारोहमा शिक्षा, विज्ञान तथा प्रविधि मन्त्रालयका सचिब सुरेश अधिकारीले ‘एम्बेसडर अफ पाकिस्तान स्कलरसिप’ हस्तान्तरण गर्नुभयो ।
देशभरिबाट छानिएका उत्कृष्ट विद्यार्थीहरूलाई छात्रवृत्ति प्रदान गरिएको दूतावासले जनाएको छ । यस वर्ष ११९ विद्यालयका १८० विद्यार्थीले छात्रवृत्ति पाएका छन् । साथै उत्कृष्ट विद्यार्थीलाई ल्यापटप प्रदान गरिएको थियो ।
कार्यक्रममा बोल्दै सचिब अधिकारीले पाकिस्तानले शिक्षाको क्षेत्रमा निरन्तर सहयोग गरेकोमा धन्यवाद दिदै यो नेपाल र पाकिस्तानबीचको घनिष्ट मैत्रीपूर्ण सम्बन्धको प्रतिबिम्ब भएको बताउनु भयो । उहाँले दुई देश बिच शिक्षाका क्षेत्रमा सहकार्य सुखद भएको उल्लेख गर्दे पाकिस्तानका पूर्व विद्यार्थीले नेपालको विकासमा योगदान पुर्याएको भन्दै प्रशंसा गर्नुभयो ।
पाकिस्तानका राजदूत अबरार एच हाशमीले छात्रवृत्ति कार्यक्रमलाई निरन्तरता दिदै थप सहयोगको क्षेत्रमा सहकार्य गर्ने बताउनु भयो । उहाँले नेपाली युवालाई अध्ययन, खेलकुद र स्वास्थ्य ,सामाजिक गतिविधिका क्षेत्रमा उत्प्रेरित गर्ने जनाउदै द्विपक्षीय सहयोगको महत्वपूर्ण रहेको बताउनु भयो ।
एम्बेसडर अफ पाकिस्तान छात्रवृत्ति कार्यक्रम सन् २०१३ मा सुरु भएको हो ।
