काठमाडौं । प्रधानमन्त्री केपी शर्मा ओलीले कोरोनाको कहरका बिचमा विकास निमाणका काम नरोकिएको बताएका छन् । सोमबार राप्ती नदीमा निर्माण भएको पुलको उद्घाटन गर्दै ओलीले लकडाउनबिच पनि विकास निर्माण नरोकिएको दाबी गरेका हुन्।
प्रधानमन्त्री ओलीले पुलको उद्घाटन गर्दै कोरोना प्रभाव बिच पनि विकास निर्माणको गति नरोकिएको भन्दै यो पुल एउटा उदाहरण भएको टिप्पणी गरेका छन्।
‘अब मुलुक विकासमा अघि बढिसक्यो। लकडाउन बिच पनि यो पुल हामीले समयमै निर्माण सम्पन्न गर्यौं। नेपालमा विकासको गति नरोकिएको यो पुल एउटा गतिलो उदाहरण हो’, प्रधानमन्त्री ओलीले भने।
यद्यपी प्रधानमान्त्री केपी ओलीले आज उद्घाटन गरेको पुल एक वर्ष अघिनै निर्माण सम्पन्न भइसकेको थियो। कार्यक्रममा उनले पुल निर्माण कम्पनी र केही स्थानीयलाई सम्मानसमेत गरेका थिए।
बर्दियाको गेरुवा नदीमा पुल बनाएकै कम्पनी द एएनके लुम्बिनी वाइपी जेभीले देउखुरीको राप्ती नदीको पुल बनाउने जिम्मा पाएको थियो । तत्कालीन प्रधानमन्त्री पुष्पकमल दाहाल ‘प्रचण्ड’ले २०७३ मङ्सिर २२ गते पुल शिलान्यास गरेका हुन् ।
पुलमा छोटो मन्तब्य राख्ने क्रममा प्रधानमन्त्री ओलीले राप्तीमा तटबन्ध गरी यहाँ विकासका धेरै काम गर्न सकिने भन्दै त्यतातिर अब सरकारको ध्यान जाने बताए।
