काठमाडौं । गृहमन्त्री रामबहादुर थापाले सरकारले घोषणा गरेको मध्यावधि निर्वाचन बैसाखमा हुन नसक्ने संकेत गरेका छन् । सोमबार प्रेस संगठन नेपाल कालीकोटले आयोजना गरेको पत्रकार सम्मेलनमा गृहमन्त्री थापाले सर्वोच्च अदालतले फैसला आउन ढिला भए निर्वाचन केही समय पछाडि धकेलिन बताएका हुन् ।
‘बैशाख १७ र २७ मा निर्वाचनमा हुन्छ कि हुँदैन भन्ने आंशका छ । त्यो विषय अदालतको फैसलामा निर्भर हुन्छ ,’ उनले भने ।
बैशाखमा निर्वाचन गराउन सरकार तयारी अवस्था रहेको गृहमन्त्री थापाले बताए । ‘निर्वाचन आयोग सुरक्षा निकायले सबै तयारी गरिरहेको छ,’ उनले भने,‘हामीले अदालतको फैसला कुरिरहेका छौं । अदालतको फैसला ढिला भयो भने निर्वाचन ढिला हुन्छ ।’
उनले संसद विघटन गरेर मध्यावधि निर्वाचनमा जाने सरकारको निर्णयलाई अदालतले सदर गर्ने समेत विश्वास व्यक्त गरेका हुन् ।
पार्टीभित्रको अन्तरसंघर्षमा प्रचण्ड–नेपाल पक्षले एकता विरोधी काम गरेको आरोप लगाए । उनले प्रचण्ड–नेपाल समूहमा उभिनु भनेको फुटको पक्षमा उभिनु भएकाले आफू एकताको पक्षमा उभिएको बताए ।
