काठमाडौँ । आईपीएल–२०२४ को ३८ औं खेलमा राजस्थान रोयल्सले मुम्बई इन्डियन्सलाई ९ विकेटले पराजित गरेको छ । यो सिजनमा राजस्थानको सातौं जित हो । यो जितसँगै राजस्थान प्लेअफको दौडमा पुगेको छ । टोली १४ अंकसहित अंक तालिकाको शीर्ष स्थानमा छ । अर्कोतर्फ, मुम्बई पाँचौं हारपछि सातौं स्थानमा झरेको छ ।
सोमबार जयपुरको सवाई मानसिंह स्टेडियममा मुम्बईले टस जितेर ब्याटिङ रोजेको थियो । टोलीले निर्धारित २० ओभरमा ९ विकेट गुमाएर १७९ रन बनाएको थियो । राजस्थानले १८.४ ओभरमा एक विकेट गुमाएर १८० रनको लक्ष्य पुरा गर्यो । खेलको प्लेयर अफ दि म्याच सन्दीप शर्मा भए । उनले ४ ओभरमा १८ रन दिएर ५ विकेट लिए ।
एमआईका लागि तिलक वर्माले ४५ बलमा ३ छक्का सहित ६५ रनको अर्धशतक खेले भने नेहल वढेरा ४९ रन बनाएर आउट भए । मोहम्मद नाबीले २३ रनको योगदान दिए । राजस्थानका सन्दीप शर्माले ५ विकेट लिए । ट्रेन्ट बोल्टले २ विकेट लिए । युजभेन्द्र चहल र आवेश खानले एक–एक विकेट लिए ।
लक्ष्य पछ्याउने क्रममा आरआरका ओपनर यशस्वी जैसवालले ६० बलमा अविजित १०४ रनको शतकीय इनिङ्स खेले । उनको आईपीएल करिअरमा यो दोस्रो शतक हो । उनले ९ चौका र ७ छक्का प्रहार गरे । जोस बटलरले ३५ र कप्तान सञ्जु सामसनले अविजित ३८ रनको योगदान दिए । एमआईबाट पियुष चावलाले एक मात्र विकेट लिए ।
