काठमाडौं । सर्वोच्च अदालतका चार जना पूर्वप्रधान्यायाधीशविरुद्ध अवहेलना मुद्दा दायर भएको छ । संसद विघटनको विरोधमा संयुक्त विज्ञप्ति जारी गर्ने चार पूर्वप्रधान्यायाधीशविरुद्ध अधिवक्ता धनजीत बस्नेतले अदालतमा अवहेलना मुद्दा दायर गरेका हुन् ।
अधिवक्ता बस्नेतले पूर्वप्रधान्यायाधीशहरु सुशीला कार्की, अनुपराज शर्मा, मीनबहादुर रायमाझी र कल्याण श्रेष्ठविरुद्ध दायर गरेको मुद्दाको पेशी माघ १५ गते तोकिएको छ ।
रिट निवेदकले अदालतमा विचाराधीन मुद्दामा टिप्पणी गरी स्वतन्त्र र निष्पक्ष न्याय सम्पादनमा हस्तक्षेप गरेको भन्दै उनीहरुविरुद्ध न्याय प्रशासन ऐन २०७३ को दफा १७ को उपदफा ४ बमोजिम हदैसम्मको सजायँ माग गरेका छन् । अदालतको अवहेलना गरेको ठहरेमा कसूरदारलाई एक वर्षसम्म कैद वा दश हजार रूपैयाँसम्म जरिवाना वा दुवै सजाय वा अन्य उपयुक्त आदेश गर्न सक्ने कानुनी व्यवस्था छ ।
पूर्वप्रधान्यायाधीशहरुले २४ पुसमा संयुक्त विज्ञप्ति निकालेर प्रतिनिधिसभा विघटनलाई असंवैधानिक भनेका थिए ।
