काठमाडौँ । इन्डियन प्रिमियर लिग (आईपीएल)को चालू सिजनमा सनराइजर्स हैदराबादले लगातार चौथो जित हात पारेको छ । टोलीले लिगको ३५औं खेलमा दिल्ली क्यापिटल्सलाई ६७ रनले पराजित गरेको हो ।
यो जितसँगै सनराइजर्स अंक तालिकाको दोस्रो स्थानमा उक्लिएको छ भने दिल्ली एक स्थान झर्दै सातौं स्थानमा पुगेको छ ।
शनिबार अरुण जेटली स्टेडियममा दिल्लीले टस जितेर पहिले बलिङ रोजेको थियो । हैदराबादले २० ओभरमा ७ विकेट गुमाएर २६६ रन बनायो । टोलीले सिजनमा तेस्रो पटक २५० भन्दा बढी रन बनाएको छ । जवाफमा दिल्लीको टोली १९.१ ओभरमा १९९ रनमा अलआउट भयो ।
खेलको प्लेयर अफ दि म्याच ट्राभिस हेड भए । उनले ३२ बलमा ८९ रनको इनिङ खेले । हेडको इनिङ्समा ११ चौका र ६ छक्का समावेश थियो ।
टस हारेर ब्याटिङमा उत्रिएको हैदराबादका ओपनर ट्राभिस हेडले ३२ बलमा ८९ रन बनाए भने अभिषेक शर्माले १२ बलमा ४६ रनको इनिङ खेले । यी दुईबीच १३१ रनको ओपनिङ साझेदारी थियो । त्यसपछि शाहबाज अहमदले अविजित ५९ र नितिश कुमार रेड्डीले ३७ रन बनाए । दिल्लीका कुलदीप यादवले ४ विकेट लिए । अक्षर पटेलले एक विकेट लिए ।
रन चेसमा दिल्लीका लागि ज्याक फ्रेजर–म्यागर्कले १८ बलमा ६५ रन बनाए भने कप्तान ऋषभ पन्तले ३५ बलमा ४४ र अभिषेक पोरेलले २२ बलमा ४२ रनको योगदान दिए । एसआरएचका टी नटराजनले ४ विकेट लिए । नितिश रेड्डी र मयंक मार्कण्डेले २–२ विकेट लिए ।
