काठमाडौँ । इन्डियन प्रिमियर लिग (आईपीएल)अन्तर्गतको रोमाञ्चक खेलमा राजस्थान रोयल्सले कोलकाता नाइटलाई २ विकेटले पराजित गरेको छ ।
जोस बटलरको शतकको मद्दतमा टोलीले २० ओभरमा २२४ रनको लक्ष्य पछ्यायो, जुन आईपीएल इतिहासमा सबैभन्दा सफल रन चेज बराबर हो ।
यसअघि आरआरले २०२० मा पञ्जाबविरुद्ध २२४ रनको लक्ष्य पछ्याएको थियो ।
इडेन गार्डेन स्टेडियममा राजस्थानले टस जितेर बलिङ रोजेको थियो । कोलकाताले २० ओभरमा ६ विकेट गुमाएर २२३ रन बनाएको थियो । सुनिल नारायणले ५६ बलमा १०९ रन बनाए ।
राजस्थानले निर्धारित २० ओभर खेल्दै ८ विकेट गुमाएर २२४ रन बनायो । जोस बटलरले ६० बलमा नटआउट १०७ रन बनाए । यस्तै, रियान परागले १४ बलमा ३४, रोभमान पोवेलले १३ बलमा २६ तथा यशस्वी जैसवालले ९ बलमा १९ रन जोडे ।
बलिङतर्फ कोलकाताका हर्षित राणा, सुनील नारायण र वरुण चक्रवर्तीले २–२ विकेट लिए भने वैभव अरोडाले १ विकेट लिए ।
त्यसअघि टस हारेर ब्याटिङ गरेको कोलकाताले २० ओभरमा ६ विकेट गुमाएर २२३ रन जोड्यो । सुनील नारायणले आईपीएल करिअरमा पहिलो शतक बनाए । उनले ५६ बलमा १३ चौका र ६ छक्काको मद्धतमा १०९ रन जोडे । यस्तै, अंगक्रिश रघुवंशीले ३०, रिंकु सिंहले २०, आन्द्रे रसेलले १३, श्रेयस ऐयरले ११ रन जोडे ।
बलिङतर्फ राजस्थानका आभेस खान र कुलदीप सेनले २–२ तथा ट्रेन्ट बोल्ट र युजभेन्द्र चहलले १–१ विकेट लिए । जितसँगै राजस्थान ७ खेलमा ६ जितसहित १२ अंक जोड्दै शीर्षस्थानमा यथावत छ । कोलकाता ६ खेलबाट ८ अंकसहित दोस्रो स्थानमा छ ।
