काठमाडौँ । चेन्नई सुपर किंग्सले मुम्बई इन्डियन्सलाई २० रनले पराजित गर्दै अंक तालिकामा ८ अंकसहित कोलकाता नाइट राइडर्ससँग बराबरी गरेको छ ।
टोली ०.७२६ को नेट रनरेटका साथ अंक तालिकामा तेस्रो स्थानमा छ । योसँगै मुम्बई चार अंकसहित आठौं स्थानमा छ ।
आइतबार भएको आईपीएलको २९ औँ खेलमा टस जितेर पहिले ब्याटिङ गरेको चेन्नईले २० ओभरमा चार विकेट गुमाएर २०६ रन बनाएको थियो । जवाफमा मुम्बईले २० ओभरमा ६ विकेट गुमाएर १८६ रनमात्रै बनायो ।
यो खेलमा मुम्बईले बलियो सुरुवात गरेको थियो । इशान किशन र रोहित शर्माबीच पहिलो विकेटका लागि ७० रनको साझेदारी भएको थियो । मथिसा पथिरानाले एमआई विरुद्ध घातक बलिङ गरे । उनले यो खेलमा चार विकेट लिए ।
तेस्रो नम्बरमा ब्याटिङ गर्न आएका सूर्यकुमार यादव २१ वर्षीय बलरबाट शून्य रनमै आउट भए । उनी खाता नखोली नै प्याभिलियन फर्किए । त्यसपछि तिलक वर्मा र रोहितबीच तेस्रो विकेटका लागि ६० रनको साझेदारी भयो ।
उनले पाँच चौकाको मद्दतले ३१ रन बनाउन सफल भए । यो खेलमा हार्दिक पाण्ड्याको ब्याटले काम गरेन । उनी जम्मा दुई रन बनाएर आउट भए । तुषार देशपाण्डेले उनलाई आफ्नो शिकार बनाए । चेन्नईविरुद्ध टिम डेभिड १३ रन, रोमारियो शेफर्डले एक रन र मोहम्मद नाबी ४ रनमा अविजित रहे ।
यो खेलमा मुम्बई इन्डियन्सका पूर्वकप्तान रोहित शर्माले दमदार प्रदर्शन गर्दै आईपीएल करियरको दोस्रो शतक प्रहार गरेका थिए । उनले आफ्नो शतक ६० बलमा पूरा गरे । यस खेलमा ३६ वर्षीय ब्याट्सम्यानले ६३ बलमा ११ चौका र पाँच छक्काको मद्दतमा १०५ रन बनाएका थिए । तर, उनले आफ्नो टोलीलाई लगातार तेस्रो जित दिलाउन सकेनन् ।
चेन्नईका लागि यो खेलमा मथिशा पाथिरानाले ४ विकेट लिए भने तुषार देशपाण्डे र मुस्ताफिजुर रहमानले एक-एक विकेट लिए ।
त्यसअघि ऋतुराज गायकवाड र शिवम दुबेले अर्धशतक बनाएका थिए । चेन्नईको सुरुवात राम्रो हुन सकेन । ओपनिङमा ब्याटिङमा आएका अजिंक्य रहाणे मात्र ५ रन बनाएर प्याभिलियन फर्किए । रचिन रविन्द्रले पनि २१ रनमात्रै बनाउन सके ।
यसपछि दुबे र गायकवाडबीच तेस्रो विकेटका लागि ९० रनको साझेदारी भयो, जसलाई हार्दिक पाण्ड्याले तोडेका थिए । उनले १५० रनको स्कोरमा चेन्नईका कप्तानलाई आउट गरे । यस खेलमा रुतुराजले ४० बल सामना गर्दै ६९ रन बनाए । यस क्रममा उनको ब्याटबाट पाँच चौका र पाँच छक्का निस्केका थिए ।
टोलीलाई चौथो झट्का डेरिल मिचेलको रुपमा परेको थियो । उनी १७ रन बनाएर फर्किए । पाण्ड्याले उनलाई अन्तिम ओभरको पहिलो बलमा नाबीको हातमा क्याच आउट गराए । छैटौं नम्बरमा ब्याटिङ गर्न आएका महेन्द्र सिंह धोनीले अन्तिम चार बलमा २० रन बनाए । उनले लगातार तीन बलमा तीन छक्का प्रहार गरे । यस अवधिमा उनको स्ट्राइक रेट ५ सय थियो । धोनीलाई मैदानमा देखेर फ्यानहरु निकै उत्साहित बनेका थिए ।
