बुटवल । सुप्रिम बचत तथा ऋण सहकारी प्रकरणको अनुसन्धान सकेर प्रहरीले प्रतिवेदन बुझाएको छ ।
शुक्रबार सहकारी घोटालाबारे अनुसन्धान सकेर जिल्ला सरकारी वकिल कार्यालयमा अनुसन्धान प्रतिवेदन बुझाएको रुपन्देहीका एसपी रन्जित सिंह राठौरले जानकारी दिए ।
प्रहरीले गितेन्द्रबाबु (जीबी) राईसहित २८ जनालाई प्रतिवादी बनाउन सरकारी वकिललाई राय दिएको छ । साथ,ै १ अर्ब २ करोड मागदाबी लिनुपर्ने प्रतिवेदन बुझाइएको एसपी राठौरले बताए ।
सुप्रिमको रकम हिनामिना प्रकरणमा पूर्व उपराष्ट्रपतिका छोरा एवं पूर्व कोषाध्यक्ष दिपेश पुन, अध्यक्ष ओमप्रसाद गुरुङ, दुर्गा चापागाई पाण्डे, दिपक न्यौपाने र निता थापा मगर पक्राउ परेका छन् । यी बाहेक अरूलाई फरार प्रतिवादी कायम गरिएको छ ।
सहकारीमा राखेको निक्षेप हिनामिना गरेर ठगी गरेको आरोपमा १ हजार ८३१ जनाले इलाका प्रहरी कार्यालय बुटवलमा जाहेरी दिएका छन् । सहकारीको कुल १ अर्ब २ करोड रकम हिनामिना भएको प्रहरीको निष्कर्ष छ ।
