पोखरा । नेकमा एमाले अध्यक्ष केपी शर्मा ओलीले पार्टीमा पूर्व अध्यक्षलाई वरिष्ठ नेताको रुपमा दोस्रो वरियतामा राखेर पार्टीले गलत अभ्यास शुरु गरेको बताउनु भएको छ ।
शुक्रबार पोखरामा आयोजित एमाले कास्कीका नवनिर्वाचित जिल्ला कमिटीको पद तथा गोपनियताको सफत ग्रहण कार्यक्रममा सम्वोधन गर्दै अध्यक्ष ओलीले पार्टीमा पूर्व अध्यक्षलाई वरिष्ठ नेताकोरुपमा दोस्रो वरियतामा राखेर पार्टीले गलत अभ्यास शुरु गरेको तर अव त्यो अभ्यास एमालेमा नदोहोरिने बताउनु भयो ।
उहाँले भन्नुभयो ‘माधव नेपालले १५ वर्ष पार्टी अध्यक्ष भएर चलाए, प्रधानमन्त्री पनि भए । अनि भन्छन्, मलाई खोइ, मेरो के भयो त ? मैले के पाएँ ?’ अहिले समीकरणमा हुनुहुन्छ । त्यो पनि ख्याल गर्नुपर्नेछ फेरि मैले झण्डै–झण्डै बिर्सिएछु ।झलनाथ खनालले पनि १३ वर्ष पार्टी प्रमुख र प्रधानमन्त्री भए । त्यसपछि मेरो भाग खोइ त भनेर खोजे । म त्यस्तो गर्दिनँ ।’
उहाँले देशद्रोही गठबन्धन तोडेर राष्ट्रहितको समिकरण एमालेले बनाएको बताउनु भयो काँग्रेस नेतृत्व गठबन्धन सरकारका कारण देशमा चरम संकट देखा परेको र त्यसको निकासका लागि अरु कुनै शक्तिले नभई आफुहरुले नै राष्ट्रहितका लागि नयाँ सत्ता समिकरण निर्माण गरेको दावी गर्नुभयो ।
पछिल्लो समय देशमा अराजनीतिक गतिविधि र राष्ट्रहित विपरितका गतिविधि बढेको अध्यक्ष ओलीको आरोप थियो । बैंकबाट ऋण लिएर नतिर्ने, नतिर भन्दै हिड्ने, अराजक गतिविधि फैलाउदै, आफैले आफैलाई हिरोकोरुपमा प्रस्तुत गर्दै हिड्ने अराजक व्यक्तिहरुका कारण राष्ट्रिय एकतामा चोट पुगेको तथा हाम्रो देश लुगा लगाएर हिड्ने मानिसको नभई नाङ्गै हिड्ने पशुको जस्तो देश बनाउन खोजिएको भन्दै त्यसबाट देशलाई जोगाउन आवश्यक रहेको अध्यक्ष ओलीको भनाइ थियो ।
राष्ट्रमा अशान्त , उत्पादन ध्वस्त, आर्थिक अवस्था ओरालो तर्फ र देशलाई विभाजन गर्न विभिन्न गतिविधि बढेका कारण देशलाई त्यसतर्फ जान नदिन नयाँ सत्ता समिकरण आवश्यक रहेको अध्यक्ष ओलीले बताए । अहिलेको गठबन्धन नभई नयाँ समिकरण मात्र भएको उनको भनाई थियो । साथै मिसन ८४ मा देशमा मुल पार्टी नेकपा एमाले नै हुने र सबैलाई सामेल गराएर लैजाने उहाँको दावी थियो ।
