काठमाडौँ । नेपाली कांग्रेसको पदाधिकारी र पूर्वपदाधिकारीको बैठक बस्दै छ । सभापति शेरबहादुर देउवाले उपनिर्वाचनका उम्मेदवारका विषयमा छलफल गर्न बुढानीलकण्ठमा दिउँसो ३ बजेका लागि बैठक बोलाएका हुन् ।
आगामी वैशाख १५ मा हुने इलाम— २ र बझाङ प्रदेशसभा—१ को उपनिर्वाचनका उम्मेदवारबारे छलफल गरिने बताईएको छ । यस्तै, उम्मेदवारको टुङ्गो लगाउन पार्टिले मंगलबार कार्यसम्पादन समितिको बैठक पनि बोलाएको छ । कार्यसम्पादन समितिको बैठकअघि आज पदाधिकारी र पूर्व पदाधिकारीबिच छलफल हुन लागेको हो ।
आजको छलफलमा महामन्त्री विश्वप्रकाश शर्माले इलाम—२ को उम्मेदवारका सन्दर्भमा रिपोर्ट राख्ने बताईएको छ । इलाम— २ का लागि कांग्रेसबाट जिल्ला सभापति डम्बर खड्का, नेताहरू भेषराज आचार्य, केशव थापा, नगेन्द्र कुमाल, रमेश लिङ्देन, चन्द्रमाया लिम्बू र शशिकला राई गरी सात जनाको नाम सिफारिस भएको छ ।
यस्तै, बझाङ प्रदेशसभा (१)का लागि १० जनाको नाम सिफारिस गरेको छ । जसमा सत्यराज भण्डारी, विष्णुकुमार सिंह, जगतप्रसाद जोशी, अभिषेक सिंह, नन्दकृष्ण जोशी, लोकेन्द्रबहादुर रोकाया, शान्तिकुमारी बोहरा, अर्जुन स्याडाँ र ध्रुवराज उपाध्याय र नारायण हमालको नाम रहेको छ ।
