एजेन्सी । पाकिस्तानका फास्ट बलर मोहम्मद आमिरले गत आइतबार (२४ मार्च) अन्तर्राष्ट्रिय क्रिकेटबाट लिएको सन्यासलाई फिर्ता लिएको घोषणा गरेका थिए ।
आमिरले जुनमा हुने टी–२० विश्वकप २०२४ का लागि उपलब्ध हुने बताएका थिए । आमिर फर्किएसँगै पाकिस्तानको पेस बलिङ आक्रमण बलियो भएको छ ? पाकिस्तानमा पहिले नै धेरै गुणस्तरीय फास्ट बलरहरू छन्, जसमा आमिरको आगमनले थप बलियो बनाउन सक्छ ।
तर, आमिरले टी–२० विश्वकप खेल्ने वा नखेल्ने भन्ने कुरा अहिलेसम्म स्पष्ट भइसकेको छैन । पाकिस्तानले टी–२० विश्वकपअघि केही टी–२० सिरिज खेल्नुपर्नेछ । आमिर टी–२० सिरिजमा छनोट भएमा उनले टी–२० विश्वकप खेल्ने लगभग निश्चित हुनेछ ।
पाकिस्तानमा हाल शाहीन शाह अफ्रिदी, नसीम शाह र हरिस रउफ मुख्य पेसर छन् । मोहम्मद आमिरले यस बलिङ अट्याकमा आकर्षण थप्न सक्छन् । आमिर अनुभवी तेज बलर हुन् र पाकिस्तानका लागि खेल्दा उनले विश्वका सबै ब्याट्सम्यानलाई समस्यामा पारेका छन् ।
अन्तर्राष्ट्रिय क्रिकेटबाट सन्यास लिएपछि आमिर लगातार विश्वभर टी–२० लिग खेल्दै आएका छन् । यस्तो अवस्थामा आमिरले टी–२० लिगको अनुभवलाई टी–२० विश्वकपमा राम्रोसँग प्रयोग गर्न सक्छन् । सन् २०२४ को टी–२० विश्वकप वेस्ट इन्डिज र अमेरिकामा खेलाइनेछ ।
आमिरले जुन २००९ मा टी–२० अन्तर्राष्ट्रिय डेब्यू गरेका थिए । आफ्नो सन्यासको घोषणा गर्नु अघि, उनले आफ्नो करियरको अन्तिम अन्तर्राष्ट्रिय खेल अगस्त ३०, २०२० मा इङ्गल्याण्डविरुद्धको टी–२० खेल थियो । आमिरले ५० टी–२० अन्तर्राष्ट्रिय खेल खेलेका छन् जसमा २१.४० को औसतमा बलिङ गर्दै ५९ विकेट लिएका छन् । यस अवधिमा उनले ७.२ इकोनोमीमा रन खर्च गरे ।
