एजेन्सी । बलिउड अभिनेता राजिव कपुरको निधन भएको छ । हृदयघातका कारण मंगलबार अस्पताल लगिएका उनको उपचारकै क्रममा निधन भएको हो । उनी ५८ वर्षका थिए । ‘राम तेरी गंगा मैली’ स्टारर राजिव बलिउड अभिनेताहरू ऋषि कपुर र रणधीर कपुरका कान्छा भाइ हुन् ।
ऋषिकी पत्नी नीतुले सामाजिक सञ्जाल इन्स्टाग्राममार्फत राजिवको निधन भएको पुष्टि गरेकी छिन् । उनले राजिवको तस्बिरसहित लेखेकी छिन्, 'हार्दिक श्रद्धाञ्जली ।'
रणधीर अहिले भाइलाई राखिएको मुम्बईस्थित चेम्बर अस्पतालमै छन् । 'मेरो कान्छो भाइलाई गुमाउँदा निकै मर्माहत छु । डाक्टरले उनलाई बचाउन सक्दो प्रयास गरे', द टाइम्स अफ इन्डियाले उनको भनाइ उद्धृत गरेको छ ।
राजिवले 'एक जान है हम' बाट अभिनयमा डेब्यू गरेका थिए । 'राम तेरी गंगा मैली' मा पनि उनी प्रमुख भूमिकामा थिए । 'आसमान', 'लभर ब्वाइ', 'जबरजस्तु', हम तो चले पर्देसुलगायत फिल्ममा काम गरेका उनको अन्तिम फिल्म 'जमिनदार' हो ।
