एजेन्सी । आईपीएल टोली गुजरात टाइटन्सले मोहम्मद शामीको स्थानमा नयाँ खेलाडीलाई खेलाउने भएको छ । मोहम्मद शामीको स्थानमा सन्दीप वारियर गुजरात टाइटन्सको जर्सीमा देखिनेछन् ।
सन्दीप वारियरले २०२१ मा भारतका लागि टी–२० डेब्यु गरेका थिए । उनले घरेलु क्रिकेटमा तमिलनाडुको प्रतिनिधित्व गरेका थिए । यसबाहेक उनी आईपीएलमा कोलकाता नाइट राइडर्स, रोयल च्यालेन्जर्स बैंग्लोर र मुम्बई इन्डियन्सको पनि हिस्सा भइसकेका छन् ।
मोहम्मद शामीको हालै शल्यक्रिया भएको थियो । उनी चोटका कारण हाल क्रिकेटबाट बाहिर छन् ।
यसैबीच हार्दिक पाण्ड्याको नेतृत्वमा रहेको मुम्बई इन्डियन्सले घाइते दिलशान मधुशंकाको स्थानमा टोलीमा नयाँ खेलाडी समावेश गरेको छ । मुम्बई इन्डियन्सले दिलशान मधुशंकाको स्थानमा जुनियर रबाडा भनेर चिनिने क्वेना माफाकालाई समावेश गरेको छ । हालै माफाकाले यू–१९ विश्वकपमा आफ्नो प्रतिभा देखाएका थिए । त्यसपछि माफाकाको तुलना दक्षिण अफ्रिकाका महान बलर कागिसो रबाडासँग हुन थाल्यो ।
मुम्बई इन्डियन्स र गुजरात टाइटन्स मार्च २४मा आमने सामने हुनेछन् । दुबैको सिजनमा पहिलो खेल हुनेछ । अहमदाबादको नरेन्द्र मोदी स्टेडियममा दुवै टोली भिड्नेछन् । मुम्बई इन्डियन्सको कप्तान हार्दिक पाण्ड्या हुनेछन् । यस्तै गुजरात टाइटन्सको नेतृत्व युवा ओपनर शुभमन गिलले गर्नेछन् ।
