काठमाडौं । सत्ता गठबन्धन परिवर्तन भएपछि अहिले विभिन्न अड्कलबाजी र टिप्पणीहरु भइरहेका छन् । अहिलेको सरकार कति समय जान्छदेखि राष्ट्रिय स्वतन्त्र पार्टीका सभापति रवि लामिछानेलाई प्रधानमन्त्री बन्न कांग्रेसले प्रस्ताव गरेकोसम्म चर्चा छन् ।
नेपाली राजनीतिक दलका नेताहरु आफू सत्ताबाट हटेको दिनदेखि नै फेरि कसरी पुग्ने भन्ने ध्याउन्नमा देखिन्छन् । जनताको एजेन्डाको पुरै बेवास्ता गर्दै सधैं सत्ता र शक्तिमा झुमिने बानी परेका नेताहरुलाई प्रतिपक्षी भूमिका बस्ने रहर नै लाग्दैन । त्यही कारण अहिले प्रधानमन्त्री पुष्पकमल दाहालले कांग्रेससँगको सहकार्य टुटाएर एमालेसँग काँध जोडेपछि कांग्रेसमा फेरि छटपटाहट सुरु भएको छ ।
कांग्रेसका केही नेताहरुले अहिलेको गठबन्धनलाई असफल पार्न राष्ट्रिय स्वतन्त्र पार्टीका सभापति रवि लामिछानेलाई प्रधानमन्त्रीको प्रस्ताव गरेको सामाजिक सञ्जालमा चर्चा आइरहेको छ । रास्वपाकै नेताहरुलाई स्रोतको रुपमा प्रयोग गरेर सञ्चारमाध्यमहरुमा पनि यो विषय सार्वजनिक हुँदैछ । के कांग्रेसले रास्वपालाई प्रधानमन्त्रीको अफर गरेको हो त ? यति हो भने किन भन्ने प्रश्न पनि सँगसँगै आउँछ । कांग्रेसले रास्वपालाई प्रधानमन्त्रीको प्रस्ताव गरेर अहिलेको गठबन्धनमा बहुमत पुग्न नदिने खेल नखेल्ला भन्न सकिँदैन । तर एउटा लामो इतिहास भएको लोकतान्त्रिक पार्टीले त्यति काँचो र कच्चा खेल कसरी खेल्ला भन्ने प्रश्न पनि छ ।
सामाजिक सञ्जालमा कांग्रेसले रास्वपाका सभापति रवि लामिछानेलाई प्रधानमन्त्रीको प्रस्ताव गरेको हल्ला चलेसँगै नेपाली कांग्रेसका महामन्त्री विश्वप्रकाश शर्माले आफ्नो दलले कसैलाई पनि प्रधानमन्त्रीको अफर नगरेको दाबी गरेका छन् । महामन्त्री शर्माले नयाँ गठबन्धनलाई संविधान रक्षा जनहितमा कार्य गर्न शुभकामना दिएका छन् ।
उनले नयाँ परिस्थितिमा जिम्मेवार प्रतिपक्षको भूमिका तयारीमा आफूहरु रहेको पनि खुलाएका छन् ।
उनले फेसबुकमा लेखेका छन्– नयाँ गठबन्धनलाई संविधान रक्षा र जनहितमा कार्यगर्न शुभकामना । नयाँ परिस्थितिमा जिम्मेवार प्रतिपक्षको भुमिका तयारीमा छौँ हामी । केही पत्रकार मित्र शोधिरहनु भएको छ– के काँग्रेसले फलानालाई प्रधानमन्त्रीअफर गरेको हो ? स्पष्ट गरौं– कसैलाई पनि यस्तो प्रस्ताव गरिएको छैन । जय नेपाल ।
