काठमाडौँ । प्रमुख प्रतिपक्षी नेकपा (एमाले) ले प्रधानमन्त्री बालेन्द्र शाहले राष्ट्रका नाममा गर्ने सम्बोधन सरकारी सञ्चारमाध्यमलाई भन्दा निजी फेसबुक पेजको भ्युज र मनिटाइजेसनलाई प्राथमिकता दिएको आरोप लगाएको छ।
प्रतिनिधि सभाको सोमबारको बैठकमा एमालेकी सचेतक निता घतानीले प्रधानमन्त्रीले प्रविधिको प्रयोग गर्नु सकारात्मक भए पनि राज्यका आधिकारिक सञ्चार माध्यमलाई पन्छाएर सामाजिक सञ्जालको भ्युज बढाउनेतर्फ केन्द्रित हुनु उचित नभएको बताइन्।
उनले प्रधानमन्त्री शाहले संसद्को रोस्टमबाट नेपालले समेत भारतको सीमा मिचेको आशय व्यक्त गरेको भन्दै आपत्ति जनाइन्। यस्तो संवेदनशील विषयमा प्रधानमन्त्रीले कुन तथ्य, प्रमाण र कूटनीतिक आधारमा अभिव्यक्ति दिएको हो भन्ने स्पष्ट पार्नुपर्ने उनको भनाइ थियो।
‘सत्ता र सरकार अस्थायी हुन्, तर भूगोल र सार्वभौमसत्ता स्थायी हुन्छ,’ घतानीले भनिन्, ‘आफ्नै देशको अस्मितामाथि प्रश्न उठ्ने अभिव्यक्ति तत्काल संसद्को रेकर्डबाट हटाइनुपर्छ र प्रधानमन्त्रीले यस विषयमा माफी माग्नुपर्छ।’
सरकार जनताले भोगिरहेका आधारभूत समस्याप्रति गम्भीर नदेखिएको आरोप पनि उनले लगाइन्। उनका अनुसार सहकारीका बचतकर्ताहरू आफ्नो रकम फिर्ताको प्रतीक्षामा छन् भने सुकुम्बासीहरू अझै पनि सुरक्षित बासको खोजीमा छन्। तर सरकारले यी समस्याको समाधानका लागि प्रभावकारी कदम चाल्न नसकेको उनले बताइन्।
किसानले समयमा मल नपाउनुका साथै उत्पादनको उचित मूल्य नपाएको, गरिब तथा विपन्न नागरिकले उपचारको अभावमा ज्यान गुमाउनुपर्ने अवस्था रहेको र स्वास्थ्य बीमा कार्यक्रम प्रभावकारी बन्न नसकेको उनले बताइन्।
बजारमा ग्यासको अभाव र बढ्दो महँगीप्रति पनि उनले सरकारको ध्यानाकर्षण गराइन्। ‘बजारमा ग्यास छैन, तर सरकार कहाँ छ ?’ उनले प्रश्न गरिन्।
पासपोर्ट, सवारी चालक अनुमतिपत्र (लाइसेन्स) लगायतका सरकारी सेवा लिन तथा अस्पतालमा उपचार गराउन नागरिकले अझै लामो लाइनमा बस्नुपर्ने अवस्था अन्त्य हुन नसकेको उनको भनाइ थियो।
यसैबीच, पछिल्लो समय सिंहदरबारको नाम परिवर्तन गर्नुपर्ने भन्दै भइरहेको बहसबारे पनि सचेतक घतानीले संसद्मा टिप्पणी गरेकी छन्।
