विराटनगर । गृहमन्त्री रामबहादुर थापाले निर्मला पन्तको बलात्कारपछि हत्यामा संलग्नलाई छिट्टै पक्राउ पर्ने बताएका छन् । शनिबार विराटनगरमा आयोजित आमसभालाई सम्बोधन गर्दै नेता थापाले पन्तको हत्या गर्ने अपराधी कानूनको कठघरा नजिक आएको समेत दावि गरेका हुन् ।
उनले भने, निर्मलाको बलात्कारी पनि कानूनको कठघरा नजिक आएको छ । म सबै अपराधीहरूलाई सचेत गर्न चाहन्छु । यो सरकारले देशमा कुनै पनि अपराधीलाई कुनै पनि किसिमको छुट दिनेछैन ।
मन्त्री थापाले सरकारले महिला हिंसा विरुद्ध अभियान चलाएको समेत बताएका छन् ।
उनले भने, 'यो कार्यकालमा हामीले महिला हिंसाको विरुद्ध अभियान चलायौँ । त्यसको विरुद्ध अभियान चलायौँ । अस्ति भर्खर हाम्रा प्रधानमन्त्रीले भन्नुभयो, अपराधीहरूलाई पानीमुनि गएपनि छोड्ने छैनौं । त्यो भागरथीको सन्दर्भमा थियो, हामीले प्रधानमन्त्रीको उद्घोषलाई सावित गर्यौं र कानूनको कठघरामा ल्याउन सफल भएका छौं ।'
