हेटौडा । बागमती प्रदेशमा सरकार र प्रतिपक्षी दलबीच देखिएको बजेटसम्बन्धी विवाद समाधानका लागि विशेष समिति गठन गर्न दलहरू सहमत भएका छन् ।
बिहीबार दलहरूबिच भएको छलफलमा सबै दलहरूको प्रतिनिधित्व हुने समिति गठन गर्ने सहमति भएको हो ।
नेपाली कांग्रेस संसदीय दलका प्रमुख सचेतक गोविन्द लम्साल संयोजकत्वमा बन्न लागेको समितिमा नेकपा माओवादी केन्द्र, नेकपा एकीकृत समाजवादी, नेकपा एमाले, राप्रपाबाट २-२ जना रहनेछन् । नेमकिपाले भने समितिमा बस्न अस्वीकार गरेको छ ।
समितिले यसबारे अध्ययन गरेर फागुन २९ गते संसद्मा प्रतिवेदन बुझाउने प्रमुख प्रतिपक्षी दल नेकपा एमालेका मुख्य सचेतक मधुसूदन पौडेलले जानकारी दिए । समितिले बुझाएको प्रतिवेदनमाथि छलफल गरेर सरकारलाई आवश्यक निर्देशन दिइने उनले बताए ।
दलहरूबिच सहमति बनेसँगै बागमती प्रदेश सभाको बैठक बस्ने तयारी गरिएको छ । बैठकले समितिका सदस्यहरू चयन गर्ने छ ।
