काठमाडौं । साताको पहिलो कारोबार दिन आइतबार नेप्से परिसूचक ३.६६ अंकले बढेर २ हजार ६४०.३४ विन्दुमा पुगेको छ । यो दिन सेन्सेटिभ इन्डेक्स भने २.२० अंक घटेर ४७९.५८ विन्दुमा झरेको हो ।
आइतबार समग्र धितोपत्र कारोबार मापक नेप्से इन्डेक्स सामान्य अंकले उकालो लागे पनि ठूला कम्पनीहरुको मात्र कारोबार मापक सेन्सेटिभ इन्डेक्स भने घटेको हो । यस दिन २०६ वटा कम्पनीको ९१ हजार ३७८ पटकको व्यापारमा रू. ८ अर्ब ६९ करोड ७६ लाख ४९ हजार बराबरको २ करोड ४० लाख ३४ हजार ७५४ कित्ता शेयर खरीदविक्री भएको छ ।
यो दिन बैंकिङ समूहक ०.३७ प्रतिशत, वित्त ०.३५ प्रतिशत, निर्जीवन बीमा ०.६४ प्रतिशत, लघुवित्त १.०१ प्रतिशत र जीवन बीमा समूहको परिसूचक १.९६ प्रतिशतले घटेको छ ।
आइतबारको बजारबाट म्युचुअल फण्ड र जलविद्युत् समूहका लगानीकर्ताहरुले सर्वाधिक कमाएका छन् । यो दिन म्युचुअल फण्ड समूहको सर्वाधिक ६.४ प्रतिशत र जलविद्युत् समूहको परिसूचक ४.२९ प्रतिशत बढेको हो ।
त्यस्तै यो दिन व्यापारिकको ०.५४ प्रतिशत, होटलको ०.५९ प्रतिशत, विकास बैंकको १.०७ प्रतिशत, उत्पादन तथा प्रशोधनको ०.०८ प्रतिशत र अन्यको १.८८ प्रतिशत परिसूचक बढेको छ ।
यो दिन नेपाल बैंकले कुल कारोबारमा सर्वाधिक हिस्सा ओगटेको छ । उक्त बैंकको रू. ६१ करोड ४२ लाख ६२ हजार बराबरको शेयर कारोबार भएको हो । सर्वाधिक रकमको कारोबार भएको उक्त बैंकको शेयरमूल्य भने ४.७८ प्रतिशत अर्थात प्रतिकित्ता रू. २१ ले बढेर रू. ४६० कायम भएको छ ।
