काठमाडौँ । त्रिदेशीय टी–२० सिरिज अन्तर्गत घरेलु मैदानमा नेपालले लगातार दोस्रो खेलमा पराजय ब्यहोर्यो । आज कीर्तिपुरस्थित त्रिवि मैदानमा खेलको नतिजाका लागि अन्तिमसम्म कुर्नुपरेको थियो ।
खेलको १७ औं ओभरको समाप्तीमा ९ रनमात्रै जोडेको नेपालले १८ औं ओभरको समाप्तीमा १८ र १९ औं ओभरको समाप्तीमा १५ रन जोडेर जिततर्फ अघि बढेको थियो । दर्शकहरुबाट नेपालले खेल जित्ने भयो भन्दै मैदानमा चर्को आवाजले ‘नेपाल–नेपाल’ गुन्जिरहेको थियो ।
क्रिजमा दिपेन्द्र सिंह ऐरी र करण केसी थिए । यी दुबैले आवश्यक परेको खण्डको ठूला शट खेल्न सक्छन् । बाउन्ड्री शट खेल्न दुबै माहिर छन् । यसमानेमा दर्शक नेपालले खेल जित्छ भन्ने पक्षमा थिए । अन्तिम ओभरमा नेदरल्यान्ड्सका कप्तान स्कट इडवार्ड्सले स्पिनर भान डर मर्वीको हातमा बल थमाए । डेथ ओभरमा प्रायजसो फास्ट बलरलाई बलिङ गर्न लगाइन्छ । तर कप्तानले भानमाथि विश्वास लिए ।
नेपाललाई अन्तिम ओभरमा १५ रनको आवश्यक थियो । पहिलो बलमा दिपेन्द्रले चौका प्रहार गरे । त्यसपछि दिपेन्द्रले अर्को ठूलो शट खेल्दै छक्का प्रहार गरे । १५ रनको रनरेट आवश्यक रहेको अवस्थामा लगातार दुई बाउन्ड्रीले खेल नेपालको पक्षमा गयो । तर, तेस्रो बलमा दिपेन्द्र सिंह ऐरी र करण केसी दुई रन लिनका लागि दौडिए । करण केसी रनआउट हुन पुगे तब, खेलमा अर्को टर्निङ पोइन्ट आयो । नेपाललाई ३ बलमा ४ रनको आवश्यक थियो ।
उत्कृष्ट पारी खेलिरहेका दिपेन्द्र क्रिजमा रहँदासम्म अन्तिम बलसम्म पनि दिपेन्द्रले चमत्कार गर्न सक्छन् भन्ने विश्वास नेपाली फ्यानलाई परेको थियो । तर, ओभरको चौंथो बलमा उनले ठूलो शट खेल्नका लागि ब्याट उठाए र उनलाई भान मर्वीले आउट पारे । सायद उक्त बल छाडेर उनी अन्य दुई बल कुरेको भए खेल नेपालको पक्षमा आउन पनि सक्ने थियो । त्यसपछि एकाएक खेल नेदरल्यान्ड्सको पक्षमा गयो ।
क्रिजमा दुबै (गुलशन झा र प्रतिश जिसि) सेट हुन नपाएका ब्याट्सम्यान थिए । मर्वीले ओभरको पाँचौं बलमा डट बल फ्याँके । यस्तै अन्तिम बलमा एलबीडब्लु पार्दै जिसिलाई आउट पारे । खेल नेदरल्यान्ड्सको पक्षमा गयो । नेदरल्यान्ड्स २ रजले विजयी हुन पुग्यो ।
यससँगै नेपालको यो लगातार दोस्रो हार हो । हिजो मंगलबार भएको पहिलो खेलमा नेपाल नामिबियासँग २० रनले पराजित भएको थियो । आजको खेलपछि पत्रकारहरुसँग कुरा गर्दै मुख्य प्रशिक्षक मोन्टी देशाईले नेपालको अझै फाइनल पुग्ने आशा जिवितै रहेको बताएका छन् । नेपालले अब अर्को खेल १ मार्चमा नामिबियासँग खेल्नेछ । तीन टोलीले एक–अर्कासँग दुई–दुई खेल खेल्नेछन् । शीर्ष दुई टोलीले उपाधिका लागि फाइनल खेल्नेछन् ।
