काठमाडौं ।नेपाली कम्युनिष्ट पार्टीले सुनसरीको देवानगञ्ज गाउँपालिका–३, कप्तानगञ्जमा भएको घटनाको स्वतन्त्र, निष्पक्ष र विश्वसनीय छानबिन गरी दोषीमाथि कडा कानुनी कारबाही गर्न सरकारसँग माग गरेको छ ।
पार्टीका प्रवक्ता प्रकाश ज्वालाले मंगलबार जारी गर्नुभएको प्रेस विज्ञप्तिमा दुई पक्षबीचको विवाद उग्र भएपछि भएको झडपका क्रममा सुरक्षाकर्मीले गोली चलाउँदा देवानगञ्ज गाउँपालिका–४ निवासी ओमप्रकाश मेहताको मृत्यु भएको र दर्जनभन्दा बढी व्यक्ति घाइते भएको उल्लेख गरिएको छ ।
पार्टीले मृतक मेहताप्रति श्रद्धाञ्जली व्यक्त गर्दै शोकसन्तप्त परिवारजनप्रति समवेदना प्रकट गरेको छ । साथै, घाइतेहरूको शीघ्र स्वास्थ्यलाभको कामना गर्दै उनीहरूको निःशुल्क तथा प्रभावकारी उपचारको व्यवस्था गर्न सरकारसँग माग गरेको छ ।
घटनास्थलको संवेदनशीलतालाई ध्यानमा राख्दै प्रहरीले संयम, समन्वय र जिम्मेवारीपूर्ण भूमिका निर्वाह गर्नुपर्नेमा जथाभावी गोली चलाएर नागरिकको ज्यान गएको भन्दै पार्टीले घटनालाई गम्भीर सुरक्षा लापरबाहीको संज्ञा दिएको छ ।
पार्टीले घटनामा सरकारको सुरक्षा संयन्त्रबाट ज्यादती भएको आरोप लगाउँदै यसलाई गम्भीर मानवअधिकार उल्लङ्घन र गैरन्यायिक हत्याको घटनाका रूपमा चित्रण गरेको छ । घटनाको सम्पूर्ण जिम्मेवारी सरकारले लिनुपर्ने तथा मृतकका परिवारलाई तत्काल उचित राहत र क्षतिपूर्ति उपलब्ध गराउनुपर्ने मागसमेत विज्ञप्तिमा गरिएको छ ।
नेपाली कम्युनिष्ट पार्टीले परिस्थिति थप जटिल बन्न नदिन शान्ति सुरक्षा सुदृढ गर्न, जनविश्वास कायम राख्न तथा वार्ता र संवादमार्फत समस्याको शान्तिपूर्ण समाधान खोज्न सरकार र सम्बन्धित सबै पक्षलाई आग्रह गरेको छ ।
यसैगरी, थप दुर्घटना र क्षति हुन नदिन स्थानीय जनसमुदायलाई संयमित रहन अपिल गर्दै पार्टीले सामाजिक सद्भाव र एकता कायम राख्न राजनीतिक दल, जनप्रतिनिधि, नागरिक समाज, मानवअधिकारकर्मी तथा सम्बन्धित सबै पक्षसँग आग्रह गरेको छ ।
