काठमाडौं । नेपाली कांग्रेसका पूर्वमहामन्त्री डा. शशांक कोइरालाले नेपाली कांग्रेसको महासमिति बैठकमा सहभागी हुन आएकाहरुलाई चियापान तथा भेटघाट कार्यक्रम राखेका छन् ।
कोइरालाले लैनचौरस्थित लैनचौर ब्याङ्केटमा आज चियापान कार्यक्रम आयोजना गरेका हुन् । बिहान ८ वजेदेखि १० वजेसम्म चल्ने कार्यक्रममा उनले महासमिति सदस्यहरुलाई बोलाएका छन् ।
डा. कोइरालाले आफ्नो फेसबुकमा लेखेका छन्– ‘नेपाली कांग्रेसको महासमिति बैठकमा सहभागी हुन आउनुभएका महासमिति सदस्यहरु तथा सम्पूर्ण साथीहरुको सम्मानमा आयोजित चियापान तथा भेटघाट कार्यक्रममा उपस्थित लागि हार्दिक अनुरोध गर्दछु।’
महासमिति बैठकमा बिभिन्न मुद्दामा नेता कार्यकर्ता विभाजित भएको अवस्थामा डा कोइरालाले चियापान कार्यक्रम मार्फत सवैलाई एकै स्थानमा जम्मा गर्न लागेका हुन् । बिभिन्न मुद्दामा नेता कार्यकर्ता विभाजित भएको अवस्थामा कोइरालाले चियापान कार्यक्रम गर्दै आएका छन् । नेपाली कांग्रेसमा चियापानलाई मेलमिलापको संस्कृतिको रुपमा लिने गरिन्छ ।
