एजेन्सी । भारतीय ब्याट्सम्यान श्रेयस अय्यरले बुधबार अनफिट भएकाले रणजी ट्रफी खेल्न नसक्ने बताएका थिए । अब बिहीबार एनसीए खेलकुद विज्ञान तथा मेडिसिन प्रमुख नितिन पटेलले श्रेयस फिट रहेको बताएका छन् । उनले चयनकर्ताहरूलाई इमेल गरे र अय्यरलाई नयाँ चोट नरहेको र फिट रहेको जानकारी दिए ।
अर्कोतर्फ, मुम्बई क्रिकेट संघ (एमसीए) अधिकारीले श्रेयस आईपीएलको तयारीमा व्यस्त रहेको बताएका छन् । उनी प्रतियोगिताअघि घाइते हुन चाहँदैनन्, त्यसैले उनी घरेलु क्रिकेटबाट टाढा छन् ।
बुधबार मुम्बईले रणजी ट्रफीको क्वाटरफाइनल खेलका लागि आफ्नो टोली घोषणा गरेको छ । त्यसमा श्रेयसको नाम थिएन । श्रेयसको ढाडमा चोट लागेको कारणले क्वाटरफाइनल खेल्न नसक्ने संघले जनाएको छ । टोलीको खेल २३ फेब्रुअरीबाट वानखेडे स्टेडियममा बडोदासँग हुनेछ ।
अर्कोतर्फ, इन्डियन एक्सप्रेसका अनुसार नितिन पटेलले इमेलमा लेखेका छन्, ‘श्रेयस अय्यर इंग्ल्याण्डविरुद्धको दोस्रो टेस्टपछि मात्र खेल्न र छनोटका लागि उपलब्ध थिए । टीम इन्डियाबाट बाहिरिएपछि उनलाई नयाँ चोट लागेको छैन ।’
चोटका कारण श्रेयसले गत सिजन एउटै खेल खेल्न नसकेकाले प्रतियोगिताबाट पैसा पनि पाएनन् । यसपटक उनले आईपीएलमा बढी फोकस गरेका छन्, ताकि उनले टिमको कप्तानीसँगै सबै खेल खेल्न सकून् ।
