एजेन्सी । इन्डियन प्रिमियर लिग–२०२४ को २१ खेलको तालिका बिहीबार सार्वजनिक गरिएको छ । आमनिर्वाचनका कारण यस सिजनको पूर्ण तालिका सार्वजनिक भएको छैन । दोस्रो चरणको निर्वाचनको कार्यतालिका लोकसभा निर्वाचनको मिति घोषणापछि सार्वजनिक हुनेछ ।
यस सिजनको पहिलो खेल मार्च २२ मा डिफेन्डिङ च्याम्पियन चेन्नई सुपर किंग्स र रोयल च्यालेन्जर्स बैंग्लोरबीच चेपौक स्टेडियममा हुनेछ । पहिलो चरणमा मार्च २२ देखि अप्रिल ७ सम्मको कार्यतालिका घोषणा गरिएको छ । यस अवधिमन १७ दिनमा २१ खेलहरू खेलिनेछन्, जसमा ४ डबल हेडरहरू (एक दिनमा दुई खेलहरू) समावेश हुनेछन् ।
चेन्नईले नवौं पटक आईपीएलको कुनै पनि सिजनको पहिलो खेल खेल्नेछ । टोलीले यसअघि ८ पटक यस्तो गरिसकेको छ । चेन्नईले अहिलेसम्म १० फाइनल खेलेको छ, ५ उपाधि जितेको छ ।
आईपीएलको गत सिजनको उपाधि महेन्द्र सिंह धोनीको कप्तानीमा चेन्नई सुपर किंग्सले जितेको थियो । अहमदाबादमा भएको फाइनल खेलमा टोलीले गुजरात टाइटन्सलाई ५ विकेटले पराजित गरेको थियो । यस प्रतियोगितामा चेन्नई र मुम्बईले ५र५ उपाधि जितेका छन् ।
