एजेन्सी । टी–२० अन्तर्राष्ट्रिय खेलमा अष्ट्रेलियाले न्युजिल्यान्डमाथि रोमाञ्चक जित हात पारेको छ । स्काई स्टेडियम वेलिङ्टनमा केहीबेरअघि सम्पन्न खेलमा अष्ट्रेलिया ६ विकेटले विजयी भएको हो । न्युजिल्यान्डले दिएको २१५ रनको लक्ष्य भेट्टाउन अष्ट्रेलियालाई अन्तिम ओभरको अन्तिम बलसम्म कुर्नुपरेको थियो ।
अष्ट्रेलियाले उक्त लक्ष्य २० ओभरमा शून्य बल बाँकी छँदा ४ विकेट गुमाएर भेट्टाएको हो । अष्ट्रेलियाको जितमा कप्तान मिचेल मार्श ७२ तथा टिम डेभिड ३१ रनमा अविजित रहे । ४४ बल खेलेका मार्शले २ चौका र ७ छक्का प्रहार गरे भने १० बल मात्रै खेलेका डेभिडले २ चौका र ३ छक्का प्रहार गरे । यस्तै, ट्रेभिस हेडले २४, डेभिड वार्नरले ३२, ग्लेन म्याक्सवेलले २५ र जोस इङ्लिसले २० रन जोडे ।
बलिङतर्फ न्युजिल्यान्डका मिचेल सान्टनरले २ तथा एडम मिल्ने र लोकी फर्गुसनले १–१ विकेट लिए ।
त्यसअघि टस जितेर ब्याटिङ थालेको न्युजिल्यान्डले २० ओभरमा ३ विकेट गुमाएर २१५ रन जोड्यो । उसका लागि रचिन रविन्द्रले ६८, डभोन कोनवेले ६३, फिन एलेनले ३२ रन जोड्दा ग्लेन फिलिप्स १९ तथा मार्क चाम्पमान १८ रनमा अविजित रहे ।
बलिङतर्फ अष्ट्रेलियाका लागि मिचेल स्टार्क, प्याट कमिन्स र मिचेल मार्शले १–१ विकेट लिए । न्युजिल्यान्ड हाल अष्ट्रेलियाको भ्रमणमा रहेको छ ।
