काठमाडौँ । अखिल नेपाल फुटबल संघ (एन्फा)का महासचिव किरण राईमाथि अख्तियार दुरुपयोग अनुसन्धान आयोगमा उजुरी परेको छ । राईले भ्रष्टाचार गरेको भन्दै अख्तियारमा शुक्रबार सरिता परियारको नामबाट उजुरी दर्ता भएको हो ।
महासचिव राईले विभिन्न समयमा लिएको रकम जोड्न आउँदा २५ लाख रुपैयाँ पुग्ने आरोप लगाइएको छ । उजुरीमा केटिएम सिटीका सीईओ निमा शेर्पा र त्यही कम्पनीका प्रतिनिधि राजु सिंहबीच भएको ह्वाट्सएप च्याटका अनुसार सीईओ शेर्पासँग राईले रकम बुझेको दाबी गरिएको छ ।
महासचिव राईले २३ जुन, २०२३ मा दरबारमार्ग पुरानो घरबाट दिनको २ः२० बजे ५ लाख रुपैयाँ लिएको दाबी गरिएको छ ।
उजुरी पत्रमा भनिएको छ, ‘अखिल नेपाल फुटबल संघ एन्फा र शेर्पा आउट डुअर स्पोर्टस् गुड्स इण्डष्ट्रिज (केटिएम सिटी)बीच एन्फालाई आवश्यक पर्ने खेल सामाग्री आपूर्ति सम्झौता गरिएको थियो । संघका महासचिव किरण राईले पदको दुरुपयोग गरि बक्यौता रकम देऊभन्दा पटक–पटक बार्गेनिङ्ग गर्दै रकम लिने गरेको र रकम दिएमा अबको कन्ट्रयाक पनि तपाईंको कम्पनीलाई नै दिन्छु भनेर केटिएम सिटीबाट रकम बुझिलिने गरेको जानकारी गराइएको छ ।’
