एजेन्सी । गत वर्ष घरेलु मैदानमा भएको विश्व टेस्ट च्याम्पियनसिप (डब्लुटीसी) र एकदिवसीय विश्वकपको फाइनलमा अस्ट्रेलियासँग सिनियर भारतीय टोली पराजित भएपछि आइतबार यू–१९ विश्वकपको उपाधि खेलमा पनि भारतीय युवा टोलीले अष्ट्रेलियाविरुद्ध निराश बन्यो ।
यसरी भारतले लगातार तीन पटक आईसीसीको फाइनलमा अष्ट्रेलियासँग हार बेहोर्न पुग्यो ।
दक्षिण अफ्रिकाको बेनोनीमा भएको फाइनल खेलमा अष्ट्रेलियाले भारतीय यू–१९ टोलीलाई ७९ रनले पराजित गर्दै चौथो पटक उपाधि जितेको छ भने उदय सहारनको नेतृत्वमा रहेको भारतीय टोली उपाधि रक्षा गर्न असफल भएको छ । अस्ट्रेलियाले हरजस सिंह (५५) को अर्धशतकीय पारीमा निर्धारित ५० ओभरमा सात विकेट गुमाएर २५३ रनको चुनौतीपूर्ण स्कोर बनाएको थियो ।
यो यस प्रतियोगिताको फाइनलमा बनेको उच्च स्कोर हो । यसअघि सन् १९९८ मा न्युजिल्यान्डविरुद्धको लक्ष्य पछ्याउने क्रममा इंग्ल्याण्डले फाइनलमा तीन विकेट गुमाएर २४२ रन बनाएको थियो । जवाफमा भारतीय टोली ४३.५ ओभरमा १७४ रनमा अलआउट भयो ।
जसरी गत वर्षको एकदिवसीय विश्वकपमा रोहित शर्माको कप्तानीमा रहेको भारतीय टोली सेमिफाइनलसम्म अपराजित रह्यो र फाइनलमा प्याट कमिन्सको नेतृत्वमा रहेको अष्ट्रेलियाको टोलीसँग पराजित भएको थियो, त्यसैगरी भारतको युवा टोली पनि सेमिफाइनलसम्म अपराजित रह्यो । एकदिवसीय विश्वकपमा अपराजित रह्यो, प्रतियोगितामा उत्कृष्ट प्रदर्शन गरेको थियो र सेमिफाइनलसम्म कुनै पनि टोलीले पराजित गर्न सकेन ।
तर, उपाधि जित्ने क्रममा भारतीय अन्डर १९ टोलीले पनि अपराजित यात्रालाई निरन्तरता दिन सकेन । यस प्रतियोगिताको सर्वाधिक पाँच पटक उपाधि जितेको भारतीय टोली लगातार दोस्रो र छैटौं पटक उपाधि जित्ने लक्ष्य लिएर आएको थियो ।
