काठमाडौँ । प्रधानमन्त्री कप एकदिवसीय पुरुष क्रिकेटले शनिवार विजेताका रूपमा नेपाल पुलिस क्लवलाई पाएको छ ।
पुलिसले शनिवार कीर्तिपुरमा सम्पन्न फाइनलमा विभागीय टोली नेपाल आर्मी क्लवलाई हराउँदै उपाधि उचालेको हो । पुलिस तेस्रो पल्ट च्याम्पियन भयो । उपाधि जित्ने क्रममा पुलिसले आफ्नो अपराजित यात्रालाई प्रतियोगिताभर कायम राख्यो । पुलिसले लिगमा ९ र फाइनल गरी कुल १० खेलको नतिजा आफ्नो पक्षमा पार्यो । प्रतियोगिताभर कुल ४६ खेल सम्पन्न भए । यसबीच यस पटक धेरै आशालाग्दा प्रदर्शन भए । हुन त सकारात्मक नतिजा आउँदा खेल मैदानको प्रभाव पनि रह्यो ।
यस पटक केन्द्रसँगै मोफसलमा गरी तीन स्थानमा खेल आयोजना भयो । भैरहवामा ११ खेल सञ्चालन भए । बाँकी खेल मुलपानी क्रिकेट मैदान र कीर्तिपुरको त्रिवी मैदानमा खेल भयो । त्रिवी क्रिकेट मैदानमा ब्याटिङ फ्रेण्ड्ली देखिँदा धेरै रनसँगै शतक पनि बने । त्यो पनि लगातार शतक बनेको इतिहास पनि रह्यो । मुलपानी क्रिकेट मैदानमा भने बलरका लागि सहयोगी बन्यो । विशेषतः स्पिनरका लागि यो स्थान उत्तम बन्यो । त्यसैले पनि लगातार एउटै बलरले ४/५ विकेट आफ्नो नाममा लेखाए ।
यता, शतक त्रिवी क्रिकेट मैदानमा मात्र बन्यो । ९ ब्याटरले कुल १० शतक बनाए । ती सबै त्रिवी क्रिकेट मैदानमा मात्र सम्भव भएको हो । आर्मीका कप्तान विनोद भण्डारीको नाममा दुई शतक रह्यो । त्यसबाहेक पुलिसका रासिद खान, एपिएफका सन्दीप जोरा, आसिफ शेख, कोशीका सुजन थपलिया, सुदूरपश्चिमका नरेन भट्ट, वागमतीका आशुतोष घिरैया, मधेस प्रदेशका मायन यादव र अनिल साहले समान एक शतक बनाए । राष्ट्रिय टोलीका नियमित सदस्य आसिफ मात्र शतक बनाउन सफल भए ।
तर अन्य ब्याटर कुशल भुर्तेल, दीपेन्द्रसिंह ऐरी, रोहित पौडेल, कुशल मल्ल र भीम सार्कीको ब्याटबाट शतक निस्केन । गण्डकी, लुम्बिनी र कर्णाली प्रदेशका ब्याटर शतक बनाउन असफल रहे । यद्यपि, कर्णालीको प्रदर्शन भने यादगार बन्यो र पहिलोपटक विभागीय टोलीलाई हरायो । कर्णालीले विभागीय टोली एपिएफमाथि जित निकाल्दै शिर्ष चारको समीकरणमा नै उथलपुथल बनाइदियो । रोहितकुमार पौडेलको कप्तानीमा रहेको एपिएफ लिगमा शिर्ष चारभित्र नै अटाउन असफल रह्यो र इलिट ट्रफी खेल्न नै वञ्चित भयो ।
लिगमा शिर्ष चारभित्रका टोलीले इलिट ट्रफी खेल्नेछन् । त्यसभित्र पुलिस, आर्मीसँगै बागमती र मधेस प्रदेश अटाएका छन् । यद्यपि, नेपाल क्रिकेट संघ (क्यान) ले इलिट ट्रफी कुन फरम्याट, कहिले र कहाँ हुने बारे भने स्पष्ट पारिसकेको छैन । यसै प्रतियोगिताबाट आर्मी छाड्दै एपिएफको कप्तानी जिम्मेवारीसहित एपिएफ पुगेका राष्ट्रिय टोलीका कप्तान रोहितका लागि सहजै भएन । यता, यस प्रतियोगिताबाट कर्णालीले ‘अन्डरडग’ छविमा सुधार ग¥यो । लुम्बिनी र कोशी प्रदेशले भने आशातित प्रदर्शन गर्न सकेनन् ।
कर्णालीले चार जित निकाल्ने क्रममा लुम्बिनी, गण्डकी र कोसीलाई हरायो । नवौं खेलमा लुम्बिनीलाई हराउँदै कोशीले सुखद् अन्त्य ग¥यो, त्यसबाहेक भने उसको प्रदर्शन बिर्सनलायक नै रह्यो । सर्वाधिक रन बनाउने सूचिको शिर्ष ६ राष्ट्रिय टोलीका कुनै पनि सदस्य परेनन् । सर्वाधिक रनकर्ताको शीर्ष १० भित्र नै राष्ट्रिय टोलीका कप्तान रोहित मात्र अटाए । बलिङमा भने स्पिनर पूर्ण हाबी भए । सर्वाधिक विकेटकर्ताको सूचिमा नै स्पिनर रहे ।
वागमतीका सूर्य तामाङले सर्वाधिक ३० विकेट लिँदा अन्य स्पिनर सुदूरपश्चिमका शेर मल्लले २४, पुलिसका ललितनारायण राजवंशीले २३, आर्मीका साहब आलमले २३ र गण्डकीका विपिन खत्रीले २० विकेट लिए । तिब्र गतिका बलर सोमपाल कामीको नाममा १९ विकेट रह्यो । तिब्र गतिका बलरमा उनी नै धेरै विकेटकर्ता हुन् । ब्याटिङ र बलिङ दुवैमा राष्ट्रिय टोलीका खेलाडीको प्रदर्शन सन्तोषजनक रहेन । यद्यपि, केही प्रतिभावान खेलाडी भने यो प्रतियोगिताबाट आएका छन् । नयाँ खेलाडीले ब्याटिङ र बलिङ दुवैमा प्रभाव छाडे । जुन सकारात्मक पक्ष हो ।
