काठमाडौं । चार छोराछोरी सहित कर्णाली नदीमा बेपत्ता भएका एकै परिवारका पाँचजनामध्ये ४ जनाको शव भेटिएको छ । एकजनाको शव अझै भेटिएको छैन ।
कर्णालीमा बेपत्ता भएकी दैलेखको आठबीस नगरपालिका वडा वडा नम्बर ३ निमायलकी ३५ बर्षिए सुकी बडुवाल र उनका छोरा १० वर्षीया ललितको शव मंगलवार अछामको पञ्चदेवल विनायक नगरपालिका-४ स्थित कर्णाली नदीमा भेटिएको जिल्ला प्रहरी कार्यालय दैलेखका सूचना अधिकारी प्रहरी निरीक्षक राजेश साहुले जानकारी दिए ।
प्रहरीका अनुसार १६ वर्षीया छोरी कल्पना र १२ वर्षीया छोरी सरिता बडुवालको शव सोमबार नै फेला परेको थियो । ५ वर्षीया छोरी रजनी बडुवालको अवस्था भने अझै अज्ञात छ ।
उनको खोजी कार्यमा दैलेख र अछामको प्रहरी र गोताखोरको टोली खटिएको छ ।
स्थानीयका अनुसार सोमबार दिउँसो ४ बजेको समयमा सुकी छोराछोरीसहित निस्किएकी थिइन् । तर साँझ अबेरसम्म घर नआएपछि खोजी गर्दा सोमबार नै दुई छोरीको कर्णालीमा शव फेला परेको थियो ।
मृतक सुकीका श्रीमान मानसिंह बडुवाललाई प्रहरीले नियन्त्रणमा लिएको छ । दिनहुँ मदिरा सेवन गरेर श्रीमतीसँग झगडा गर्ने गरेको सूचना पाएपछि प्रहरीले उनलाई नियन्त्रणमा लिएर अनुसन्धान गरेको थालेको छ ।
