काठमाडौं । श्रीलंकाका लागि प्रस्तावित नेपाली राजदूत डा. मञ्चलाकुमारी झाले आफू आरक्षणको विरोधी रहेको बताउनुभएको छ। आफू आरक्षणका आधारमा नभई शैक्षिक योग्यता, क्षमता र अनुभवका आधारमा राजदूत पदमा सिफारिस भएको उहाँले स्पष्ट पार्नुभएको छ।
बुधबार सिंहदरबारमा बसेको संसदीय सुनुवाइ समितिको बैठकमा सांसदहरूले उहाँको सिफारिस आरक्षणका आधारमा भएको हो कि भन्ने प्रश्न उठाएपछि डा. झाले यस्तो जवाफ दिनुभएको हो। उहाँले आफूले विभिन्न विषयमा स्नातकोत्तर र विद्यावारिधिसम्मको अध्ययन गरेको उल्लेख गर्दै आफ्नो नियुक्तिलाई योग्यता र क्षमताका आधारमा मूल्याङ्कन गर्न आग्रह गर्नुभयो।
डा. झाले अर्थशास्त्र, अंग्रेजी शिक्षा, हिन्दी, राजनीतिशास्त्र तथा परराष्ट्र नीति र कूटनीतिमा स्नातकोत्तर र विद्यावारिधिसम्मको अध्ययन गरेको जानकारी दिनुभयो। साथै, सार्वजनिक विषयमा लेखन तथा विश्लेषणमार्फत पनि योगदान दिँदै आएको उहाँको भनाइ थियो।
‘म आफ्नो शैक्षिक योग्यता, क्षमता र अनुभवप्रति विश्वस्त छु। अवसरलाई आरक्षणभन्दा योग्यता र क्षमताका आधारमा प्राप्त गर्नुपर्छ भन्ने मान्यता राख्छु। त्यसैले आफ्नो नियुक्तिलाई पनि योग्यता र क्षमताका आधारमा मूल्याङ्कन गरियोस् भन्ने चाहन्छु,’ उहाँले समितिको बैठकमा भन्नुभयो।
उहाँले कूटनीतिक क्षेत्रमा प्रत्यक्ष अनुभवको कमी रहेको कुरा स्वीकार गर्दै सैद्धान्तिक ज्ञानलाई व्यावहारिक अनुभवसँग जोडेर जिम्मेवारी कुशलतापूर्वक निर्वाह गर्न सक्ने विश्वास व्यक्त गर्नुभयो।
‘सकारात्मक सोच, सिक्ने इच्छाशक्ति र दृढ प्रतिबद्धताका साथ नेपाल र श्रीलंकाबीचको सम्बन्ध सुदृढ बनाउन सक्छु भन्नेमा विश्वस्त छु,’ उहाँले भन्नुभयो।
कूटनीतिक क्षेत्रमा प्रत्यक्ष अनुभवको कमी भए पनि आफ्नो शैक्षिक पृष्ठभूमि, ज्ञान र क्षमता उपयोग गर्दै जिम्मेवारी पूरा गर्ने उहाँको भनाइ छ। नेपाल र श्रीलंकाबीचको द्विपक्षीय सम्बन्धलाई थप सुदृढ बनाउन आफूले प्रभावकारी भूमिका निर्वाह गर्न सक्ने विश्वाससमेत उहाँले व्यक्त गर्नुभएको छ।
संसदीय सुनुवाइका क्रममा उठेका प्रश्नहरूको जवाफ दिँदै डा. झाले आफ्नो नियुक्तिलाई आरक्षणसँग जोडेर नभई योग्यता, क्षमता र जिम्मेवारी निर्वाह गर्न सक्ने आधारमा मूल्याङ्कन गरिनुपर्ने धारणा राख्नुभएको हो।
