काठमाडौं । नेपाली कांग्रेसको १५औँ महाधिवेशनअन्तर्गत आदिवासी जनजाति क्लस्टरतर्फको मतगणना सम्पन्न भएको छ। आदिवासी जनजाति सहमहामन्त्रीमा बहादुर सिंह लामा तामाङ अत्यधिक मतका साथ विजयी भएका छन्।
लामाले ३ हजार २४५ मत प्राप्त गर्दै सहमहामन्त्रीमा निर्वाचित भएका हुन्। उनका प्रतिस्पर्धी ओमबहादुर घर्ती मगरले १ हजार ४४६, तारामान गुरुङले ८६३, दिलमान पाख्रिनले ६२२ र प्रशान्त मानसिंह मास्केले २४६ मत प्राप्त गरेका छन्।
आदिवासी जनजातितर्फ महिला र खुला केन्द्रीय सदस्य पदको मतगणना पनि सम्पन्न भएको छ।
महिलातर्फ ८ पदका लागि ३४ जना उम्मेदवार प्रतिस्पर्धामा थिए। यसतर्फ गीता गुरुङ २ हजार ८५९ मतसहित पहिलो स्थानमा निर्वाचित भएकी छन्।
त्यस्तै, डा. गङ्गालक्ष्मी अवालले २ हजार ७६८, रेणुका काउछ मगरले २ हजार ३९२, सपनाराज भण्डारी जोशीले २ हजार ३५१, सीता कुमारी राना मगरले २ हजार १३२, प्रमिला राईले २ हजार २०, लिलादेवी बोखिम लिम्बूले १ हजार ६८१ र पुनम लामाले १ हजार ६३६ मत प्राप्त गर्दै निर्वाचित भएका छन्।
