काठमाडौँ । जारी प्रधानमन्त्री कप २०२४ मा गण्डकी प्रदेशले बागमती प्रदेश माथि रोमान्चक जित हात पारेको छ । बागमतीलाई तीन विकेटले हराउदै गण्डकीले जित दर्ता गरेको हो ।
बागमतीले दिएको एक सय ९९ रनको मध्यम लक्ष्य पछ्याएको गण्डकीले ४९औ ओभरको तीन बल बाँकी रहँदा ७ विकेट गुमाएर लक्ष्य पुरा गर्यो । गण्डकीका लागि करन पंगेनीले सर्वाधिक ७९ रन बनाए ।
खेलमा दुई ओभरमा बाँकी रहँदा ११ रन चाहिएको अवस्थामा प्रतिश जिसीको पहिलो बलमा कमल परियार आउट भए । कृश ऐरले क्रिजमा आएर पहिलो बलमा १ रन लिए । तेस्रो बलमा करन पंगेनीले चौका प्रहार गरे र त्यसपछिको दुई बलमा दुई सिंगल लिए । अन्तिम बलमा भने करन आउट हुन पुगे ।
अब अन्तिम ओभरमा गण्डकीलाई ४ रन चाहिएको थियो । इशान पाण्डेको पहिलो बलमा कृशले सिंगल लिए । दोस्रो बलमा अंकित न्यौपानेको क्याच छुटेपछि गण्डकीले दुई रन लिन सफल भयो । चार बलमा १ रन चाहिँदा अंकितले चौका प्रहार गर्दै टीमलाई जिताए । गण्डकीका समिर कंडेलले १९ , मुश्कान थापा २७ र कमल परियार २० रन बनाए ।
तेस्रो विकेटका लागि मुश्कान थापा र करन पंगेनीले ७० रनको साझेदारी गरे । मुश्कान ३६औ ओभरमा ७१ बलमा २७ रङको सुस्त इनिङ खेल्दै रन आउट भए । त्यसपछि आएका अमृत गुरुङलाई रिजन ढकालले शुन्यमा आउट गरे । कप्तान बिपिन खत्री पनि सस्तैमा रनआउट भए । कमल परियारले २३ बलमा २० रन बनाए । बागमती प्रदेशका बलर प्रतिश जीसीले दुई विकेट लिए । रिजन ढकाल, सूर्य तामाङ र विपिन आचार्यले पनि एक–एक विकेट हात पारे ।
त्यसअघि टियु क्रिकेट मैदानमा टस जितेर पहिले ब्यटिङ रोजेको बागमतीले ४९.१ ओभरमा अलआउट हुदै एक सय ९८ रन बनाएको थियो । बागमतीको लागि आशुतोष घिराइयाले सर्वाधिक ४४ रन बनाए । आशुतोष र इशान पाण्डेले ९० रनको सुरुवाती साझेदारी गर्दै टीमलाई राम्रमे योगफलतर्फ धकेले । इशान ४३ रनमा आउट भए । बिपिन आचार्य ३८, अशोक पौडेल ३०, सूर्य तामाङ १५ र कप्तान रित गौतम १३ रन थपे ।
गण्डकीका लागि कमल परियारले ४ विकेट लिएका थिए । बिपिन खत्रीले र अमृत गुरुङले दुई तथा सन्दिप पराजुलीले समान १ विकेट लिए ।
आजको हार सँगै बागमतीले पहिलो स्थानमा उक्लिने मौका गुमाएको छ । बागमतीको ७ खेलमा ८ अंक रहेको छ । गण्डकी ५ खेलमा २ जित सहित आठौ स्थानमा यथावत नै छ । पहिलो स्थानमा ४ खेलमा ८ अंकसहित नेपाल पुलिस क्लब रहेको छ ।
