काठमाडौं । जारी प्रधानमन्त्री कप एकदिवसीय पुरुष राष्ट्रिय क्रिकेट प्रतियोगितामा त्रिभुवन आर्मी क्लबले नेपाल एपिएफ क्लबलाई ४ विकेटले पराजित गरेको छ ।
एपिएफले जितको लागि दिएको १ सय २२ रनको लक्ष्य आर्मीले २४ औं ओभरमा ६ विकेट गुमाउँदै पूरा गर्यो । आर्मीका लागि कप्तान विनोद भण्डारीले ३४ रन जोड्दै नटआउट रहे । कुशल मल्लले १९ र बसिर अहमदले १८ थपे ।
एपिएफका लागि बलिङ गरेका रमेश कुर्मीले २ तथा मौसम ढकाल र रोहित पौडेलले १/१ विकेट लिए ।
त्यसअघि भैरहवास्थित सिद्धार्थनगर रंगशालामा टस हारेर ब्याटिङको निम्तो पाएको एपिएफले ३२.४ ओभरमा अलआउट हुँदै १ सय २१ रन बनाएको थियो ।
एपिएफको लागि कप्तान रोहित कुमार पौडेलले अर्धशतकीय ईनिङ खेले । उनले ५९ रन जोडे । यस्तै, सुमित महर्जनले १४ र भुवन कार्कीले १६ रन जोड्नुबाहेक अन्य खेलाडीले दोहोरो अंकमा रन जोड्न सकेनन् ।
आर्मीका लागि सोमपाल कामीले ३ विकेट लिँदा अभिनाश कर्णले २ तथा विवेक यादव, साहब आलम र बसिर अहमदले १/१ विकेट लिए ।
यससँगै आर्मीले ५ खेलमा ३ जित र २ हारका साथ ६ अंक जोडेको छ । एपिएफ भने ५ खेलमा २ जित र ३ हारका साथ सातौं स्थानमा छ ।
