काठमाडौं । प्रधानमन्त्री कप क्रिकेट प्रतियोगितामा कर्णाली प्रदेशले गण्डकीलाई ७ विकेटले हराउँदै विजयी सुरुवात गरेको छ ।
जितको लागि गण्डकीले दिएको १ सय २३ रनको सामान्य लक्ष्य पछ्याएको कर्णालीले ३३.२ ओभरमा ३ विकेट गुमाउँदै पूरा गर्यो । कर्णालीको जितमा हिमान्शु शाहीले सर्वाधिक ५३ रनको योगदान दिए । यस्तै, कप्तान रविन्द्रजंग शाही २०, निश्चल रावल २९, विपिन शाही ६ र अर्जुन घर्तीले १० रन बनाए ।
गण्डकीका अकिंत न्यौपानेले २ र विपिन खत्रीले एक विकेट लिए ।
त्यसअघि भैरहवामा रहेको सिद्धार्थ क्रिकेट मैदानमा टस हारेर पहिला ब्याटिङ गरेको गण्डकीले ४५ ओभरमा ९ विकेट गुमाउँदै १ सय २२ रन बनाएको थियो । गण्डकीको लागि कमल परियार र अमृत गुरुङले समान २१–२१ रन बनाए । आश्वानी राना १६ र विपिन खत्री १० रन बनाए ।
कर्णालीका अनुज चनारा, दीनेश अधिकारी र दीपेन्द्र रावतले २–२ विकेट लिए भने प्रकाश जैसी, दीवान पुन र रविन्द्र शाहीले १–१ विकेट लिए ।
