काठमाडौँ । नेपाली राष्ट्रिय क्रिकेट टिमका पूर्वकप्तान सन्दीप लामिछानेले अदालतबाट सफाइ नपाएसम्म क्रिकेटबाट टाढा रहने स्वघोषणा गरेका छन् ।
नेपाल क्रिकेट संघ (क्यान) लाई पत्राचार गर्दै अदालतबाट जबरजस्ती करणीको मुद्दामा दोषी ठहरिएका लामिछानेले कुनै पनि स्तरको क्रिकेट नखेल्ने बताएका हुन् । अदालतबाट कुनै मुद्दामा दोषी प्रमाणित भएको व्यक्तिलाई तत्काल खेल्नबाट रोक्ने नेपालमा कुनै कानूनी व्यवस्था छैन । तर नैतिक विषय भएकाले सन्दीप आफैँ अलग भएका हुन् ।
क्यानले सन्दीपको विषयमा निर्णय लिन उनको सजाय निर्धारणको प्रतीक्षा गरेपनि क्यानले निर्णय लिनुअघि सन्दीप आफैँले निर्णय सुनाएका हुन् । सजाय पाइसकेपछि क्यानले पनि उनलाई क्रिकेट खेलबाट निलम्बन गरेको छ । उनी उच्च अदालतमा पुनरावेदन गरेर सफाइ पाएपछि मात्रै क्रिकेट खेल्ने मनस्थितिमा रहेको बताइएको छ ।
सन्दीपलाई जिल्ला अदालत काठमाडौंले जबरजस्ती करणीमा दोषी ठहर गर्दै हिजो ८ वर्षको जेल सजाय सुनाएको छ । यद्यपि, उनी तत्काल जेल जानुपर्ने अवस्था छैन । उनले उच्च अदालतमा पुनरावेदन गर्न सक्छन् । जिल्ला अदालतले मुद्दाको पूर्णपाठ निकालेर सन्दीपले बुझेको १०० दिनभित्र पुनरावेदन गरिसक्नुपर्छ । सन्दीपले जेलबाहिरै रहेर उक्त पुनरावेदनको मुद्दा लड्न सक्ने सुविधा कानूनत: प्राप्त छ ।
