सुर्खेत । विभागीय डर्वीमा नेपाल पुलिस क्लबलाई पराजित गर्दै नेपाल एपिएफ क्लब सुर्खेतमा जारी ३४औँ राष्ट्रिय भलिबल प्रतियोगिताको सेमिफाइनलमा प्रवेश गरेको छ ।
साविक विजेता समेत रहेको एपिएफले लगातार तीन जित निकाल्दै समूह ‘ए’ मा एक खेल बाँकी छँदै अन्तिम चारमा स्थान पक्का गरेको हो ।
अब एपिएफले मंगलबार बागमती प्रदेशलाई पराजित गरेमा समूह विजेता बन्नेछ । पुलिसले पनि मंगलबार कोशी प्रदेशलाई पराजित गरे समूह उपविजेताको रुपमा सेमिफाइनलमा पुग्नेछ ।
वीरेन्द्रनगरको खुल्लामञ्च कोर्टमा सोमबार भएको खेलमा एपिएफले पुलिसलाई ३–१ को सेटमा पराजित गर्यो । पहिलो सेटमा एपिएफले २५–१७ को सहज जित निकालेको थियो ।
दोस्रो सेटमा एपिएफले २५–१५ ले खेल आफ्नो पक्षमा पार्यो । तर, तेस्रो सेटमा भने पुलिस २५–२२ ले अगाडि रह्यो । अन्तिम सेटमा एपिएफले २५–२० को जित निकाल्दै सेमिफाइनल यात्रा तय गर्यो ।
