काठमाडौँ । राष्ट्रिय जनमोर्चाकी उपाध्यक्षलाई राष्ट्रपतिले मनोनित गर्ने सिटमा राष्ट्रियसभा सदस्य बनाइने सहमति सत्तारुढ गठबन्धनबीच भएको छ ।
आइतबार बिहान बसेको बैठकमा कांग्रेसले १०, माओवादी ६, एकीकृत समाजवादीले २ र जनता समाजवादीले एक सिट लिने प्रस्ताव भए पनि एकीकृत समाजवादीले तीन सिट मागेकाले सहमति हुन सकेको छैन ।
कूल २० सिटमध्ये राष्ट्रपतिले मनोनित गर्ने सिटमा भने जनमोर्चाकी दुर्गा पौडेललाई बनाइने बैठकमा सहमति भएको हो । राष्ट्रपतिबाट मनोनीत एकसहित राष्ट्रियसभा २० सदस्यको पदावधि फागुन २० मा सकिँदैछ । १९ सिटका लागि २३ पुसमा उम्मेदवारी दर्ता र ११ माघमा निर्वाचन मिति तोकिएको छ ।
नेकपा मसालका महासचिव मोहनविक्रम सिंहकी पत्नी पौडेल प्रतिनिधि सभा निर्वाचनमा प्युठानबाट नेकपा एमालेका उम्मेदवार सूर्य थापासँग पराजित भएकी हुनुभएको थियो ।
