काठमाडौं । प्रधानमन्त्री कप महिला टि२० राष्ट्रिय प्रतियोगितामा कोशी प्रदेशले गण्डकीलाई ५५ रनले हराएको छ । यससँगै लगातार चौथो जित हात पारेको कोशीले प्लेअफ सम्भावना उच्च बनाएको छ ।
जितको लागि १ सय ४ रनको विजयी लक्ष्य पाएको गण्डकीले १५ ओभरमा अल आउट हुँदै मात्र ४८ रन बनायो । गण्डकीकी सुमन खतिवडा २१ रनमा अविजित रहिन् । उनी बाहेक अन्य कुनैपनि खेलाडीले दोहोरो अंकमा रन बनाउन सकेनन् ।
ओपनर अञ्जली विश्वकर्मा ८, ज्योत्स्नका मरासिनी ६, सृष्टी पौडेल १, सीमा केसी ५ र धन कुमारी २ रन बनाईन्। गण्डकीका चार खेलाडी खाता नै नखोलि आउट भए ।
कोशीकी कप्तान रुविना क्षेत्रीले १ ओभरमा १ रन खर्चेर ३ विकेट लिईन् । संगिता राई र एलिसा खडियाले समान दुई दुई विकेट लिइन् ।
त्यसअघि माथिल्लो मुलपानी क्रिकेट मैदानमा टस जितेर पहिला ब्याटिङ गरेको कोशीले निर्धारित २० ओभरमा ८ विकेट गुमाउँदै १ सय ३ रन बनाएको थियो । कोशीकी बिमला मलहाले सर्वाधिक २५ रन बनाएकी थिईन् । लखिता राजवंशीले २२ तथा संगिता राइले २३ रन बनाइन् ।
गण्डकी प्रदेशकी कुसुम गोदार र सृष्टी जैशीले समान दुई दुई विकेट लिँदा आकृति तिवारी, रचना चौधरी र सुमन खतिवडाले १–१ विकेट लिइन् ।
कोशी ५ खेलमा ४ जित र १ मा हारसहित ८ अंकका साथ दोस्रो स्थानमा छ । यता, गण्डकी भने ५ खेलमा १ मा जितसहित छैटौं स्थानमा छ । एपिएफ ५ खेलमा अपराजित रहँदै प्रतियोगिताको शीर्ष स्थानमा छ ।
