काठमाडौं । प्रधानमन्त्री कप महिला टि२० राष्ट्रिय प्रतियोगितामा मधेश प्रदेशले गण्डकी प्रदेशलाई २७ रनले हराउँदै आफ्नो पहिलो जित हात पारेको छ ।
जितको लागि १ सय १३ रनको विजयी लक्ष्य पछ्याएको गण्डकी १९.४ ओभरमा अल आउट हुँदै ८५ रन बनायो। गण्डकीको लागि सुमन खतिवडाले सर्वाधिक ४२ रन बनाइन् । सृष्टी जैसी १५ रनमा आउट हुँदा अन्य कुनैपनि ब्याटरले दोहोरो अंकमा रन बनाउन सकेनन् ।
मधेशकी पुजा महतोले सर्वाधिक ३ विकेट लिइन् । सरस्वती कुमारी चौधरी, कविता गौतम र साक्षी यादवले समान एक एक विकेट लिइन् ।
त्यसअघि माथिल्लो मुलपानी क्रिकेट मैदानमा टस हारेर पहिला ब्याटिङ गरेको मधेशले निर्धारित २० ओभरमा ७ विकेट गुमाउँदै १ सय १२ रन बनाएको थियो ।
मधेशकी ओपनर पुजा महतोले सर्वाधिक ३८ रन बनाइन् । सरस्वती चौधरीले २६ र प्रतिमा शाहले १० रन बनाइन् ।
गण्डकीको लागि सुमन खतिवडाले ३ विकेट लिइन् । कुसुम गोदार र सृष्टी जैसीले एक एक विकेट लिइन् ।
