काठमाडौँ । राजधानीमा जारी प्रधानमन्त्री कप महिला राष्ट्रिय टी–२० क्रिकेट प्रतियोगितामा कोशी प्रदेशले बागमती प्रदेशलाई आठ विकेटले पराजित गरेको छ । यससँगै
जितको लागि बागमतीले दिएको ८८ रनको झिनो लक्ष्य कोशी प्रदेशले १८.१ ओभरमा दुई विकेट गुमाएर पुरा गर्यो ।
कोशी प्रदेशका लागि ओपनर काजल श्रेष्ठले अविजित ४१ रन बनाइन् । उनले ५१ बलमा एक छक्का र तीन चौका प्रहार गरिन् । यस्तै, अप्सरी बेगमले ५४ बलमा एक छक्का र चार चौकासहित ४१ रन बनाइन् । कोशी प्रदेशकी कप्तान रुविना क्षेत्रीले दुई रन बनाईन् ।
बागमती प्रदेशको लागि संस्कृति फुयाल र सोनी पाख्रिनले समान एक–एक विकेट लिए ।
त्यसअघि कीर्तिपुरस्थित टियू मैदानमा टस हारेर पहिले ब्याटिङको निम्तो पाएको बागमतीले निर्धारित २० ओभरमा आठ विकेट गुमाउँदै ८७ रनको योगफल बनाएको थियो । बागमती लागि यशोदा विष्टले सर्वाधिक ४१ रनको योगदान दिइन । उनले ५४ बल खेल्दै चार चौकाको मद्दतमा ४१ रन बनाएकी हुन् ।
त्यस्तै अस्मिना कर्माचार्यले २४ रन बनाइन् । त्यसबाहेक अन्य कुनै पनि खेलाडीले दोहोरो अङ्कमा रन बनाउन सकेनन् । कञ्चन श्रेष्ठले ८ रन जोडिन् भने सोनी पाख्रिन र खुसी डङ्गोलले समान तीन तीन जोडे ।
बलिङतर्फ कोशी प्रदेशकी अप्सरी बेगम र सबनम राईले समान दुई–दुई विकेट लिए भने सङ्गीता राईले एक विकेट लिइन् ।
यस जीतसँगै कोशी प्रदेशले प्रतियोगितामा लगातार दोस्रो जीत दर्ता गराएको छ । हिजो भएको पहिलो खेलमा कोशीले कर्णाली प्रदेशलाई १० विकेटले हराएको थियो । यता बागमतीको भने यो पहिलो हार हो । हिजो भएको खेलमा बागमतीले मधेस प्रदेशलाई पराजित गरेको थियो ।
