• १० असार २०८१, सोमबार
  •      Mon Jun 24 2024
  •   Unicode
Logo

म्यान्चेस्टर सिटी र टोटेनहमको रोमाञ्चक बराबरी



एजेन्सी । इंग्लिस प्रिमियर लिग फुटबल अन्तर्गत म्यान्चेस्टर सिटी र टोटेनहमले बराबरी खेलेका छन् ।

गएराति भएको खेलमा दुबै टिमले ३–३ गोलको बराबरी खेल्दै अंक बाँडेका हुन् । सिटीको घरेलु मैदान इतिहाडमा खेलमा सुरुवाती अग्रता भने टोटेनहमले लिएको थियो ।

खेलको छैटौं मिनेटमा नै सन हेउंग मिनले गोल गर्दै टोटेनहमलाई सुरुवाती अग्रता दिलाएका थिए । तर, नवौं मिनेटमा सनले नै आत्मघाती गोल गरेपछि सिटी खेलको १–१ बराबरीमा आयो ।

सिटीका युलियन अल्भारेजले फ्रिकिकबाट प्रहार गरेको बलमा क्लियर गर्न खोज्दा सनले आत्मघाती गोल गर्न पुगे । उनको थाइमा लागेर गोल भएको थियो । ३१ औं मिनेटमा फिल फोडेनले गोल गर्दै सिटीलाई २–१ गोलले अघि बढाए । उनले अल्भारेजको पासमा गोल गरे ।

६९ औं मिनेटमा जिओभानी लो सेल्सोले गोल गर्दै टोटेनहमलाई २–२ गोलको बराबरीमा ल्याए । उनले सनको पासमा डि–बक्स बाहिरबाट लेफ्ट कर्नरमा सुन्दर गोल गरे । यता, ८१ औं मिनेटमा ज्याक ग्रिलिसले गोल गर्दै सिटीलाई ३–२ गोलको स्थितीमा ल्याए । उनलाई एर्लिङ हालाण्डले पास उपलब्ध गराएका थिए ।

यता, ९० औं मिनेटमा डेजान कुलुसेभ्स्कीले गोल गर्दै टोटेनहमलाई ३–३ गोलको बराबरीमा ल्याउँदै हारबाट जोगाए । जोनसनले क्रस गरेको बलमा उनले हेडरमार्फत गोल गरे ।

यो नतिजासँगै सिटी १४ खेलबाट ३० अंकका साथ तालिकाको तेस्रो स्थानमा छ । सिटीको यो लगातार तेस्रो बराबरी हो । टोटेनहम समान खेलबाट २७ अंकका साथ तालिकाको पाँचौं स्थानमा छ । आर्सनल ३३ अंकका साथ शीर्षस्थानमा छ ।