एजेन्सी । भारत र अस्ट्रेलियाबीचको पाँच खेलको टी–२० सिरिजको तेस्रो खेल आज गुवाहाटीमा हुँदैछ । यो खेल जितेमा भारतीय टोलीले सिरिज मात्र जित्ने छैन, विश्व कीर्तिमान पनि बनाउनेछ ।
भारतीय टोलीले पाकिस्तानलाई पछि पार्दै सबैभन्दा बढी टी–२० अन्तर्राष्ट्रिय खेल जित्ने टोली बन्नेछ । भारतले अहिलेसम्म २११ टी–२० अन्तर्राष्ट्रिय खेलमध्ये १३५ जितेको छ । यस्तै, ६६ खेल हार्दा ४ खेल भने बराबरीमा परेका छन् । ६ खेल अनिर्णित रह्यो ।
जहाँ पाकिस्तानले २२६ टी–२० अन्तर्राष्ट्रिय खेलमध्ये १३५ जितेको छ । उसले ८२ हार बेहोरेको छ भने ३ खेल बराबरीमा परेका छन् । पाकिस्तानका ६ खेल भने अनिर्णित भएका छन् । अर्थात् अर्को जितसँगै भारतीय टोलीले पाकिस्तानलाई उछिन्नेछ ।
घरेलु मैदानमा भारतले सबैभन्दा धेरै जित हात पारेको छ । टी–२० को समग्रतामा भारत पाकिस्तानको बराबरीमा भए पनि घरेलु खेलहरूमा भारतीय टोली पहिले नै शीर्ष स्थानमा छ । भारतले आफ्नो घरेलु मैदानमा ५२ खेल जितेको छ । विश्वको कुनै पनि टोलीले घरेलु मैदानमा यति धेरै खेल जित्न सकेको छैन ।
प्रतिद्वन्द्वी टोलीको घरेलु मैदानमा सबैभन्दा धेरै टी–२० खेल जित्ने हिसाबले पाकिस्तान भारतभन्दा थोरै अन्तरले अगाडि छ । पाकिस्तानले हालसम्म प्रतिद्वन्द्वी टोलीको घरमा ८४ टी–२० अन्तर्राष्ट्रिय खेल खेलेको छ । जसमध्ये ४७ मा जित र ३२ मा हार बेहोरेको छ । भारतीय टोलीले प्रतिद्वन्द्वी टोलीको घरेलु मैदानमा ७४ खेल खेलेको छ । जसमा भारतले ४५ जित र २५ हार बेहोरेको छ ।
